【負面新聞所累】黃子恆「魔種」留下伏線 《降魔的2.0》淪為大配角

更新時間 (HKT): 2019.01.03 16:16

黃子恆成為2018年嘅新聞人物,大陸女fans Michelle爆料稱自己懷有子恆骨肉,最終疑選擇墮胎。Michelle直言不滿無綫冇對子恆作出懲罰,聲稱養好身體,就會來港搵男方私下解決。(相關新聞﹕ https://bit.ly/2PK7ncY )

今日無綫劇《降魔的2.0》(暫名)喺將軍澳電視廣播城試造型,黃子恆冇現身,係咪被飛出劇組?監製方駿釗話﹕「有預佢嘅戲份,但今次係客串,戲份唔多,我有同佢通過電話,畀通告佢,同講吓個角色。」監製強調係原班人馬,只係加入C君、譚凱琪等新原素,提到上一輯子恆飾演嘅郭展明被惡魔附身,林凱恩更懷有對方骨肉,為下一輯留下伏線,監製話﹕「係會延續番嘅,呢個bb出唔出到世?係咪魔種?會有一段故事,但唔劇透呀。」

至於馬國明同黃智雯在劇中會否開花結果?馬國明笑話﹕「應該會啩,不過今輯多咗個Zoie(譚凱琪)畀我,估唔到的士佬咁多靚女埋身,以後撈唔到演員就去揸的士車靚女。」黃智雯話今輯佢嘅角色會多啲喜劇感,笑言會多咗個鹹濕鬼C君一齊搞笑,智雯話﹕「佢係鹹濕鬼,而我今輯就會多咗超能力幫馬國明降魔。」

黃智雯雖然失落無綫視后,但都攞咗新加坡同馬來西亞嘅視后,智雯話想買樓獎勵自己,問點解唔叫男友送?佢話﹕「我哋財政獨立。」旁邊嘅馬國明笑話﹕「男友畀錢係應份嘅。」但提到女友黃心穎,馬國明嘅立場又唔同咗:「咁我哋都係財政獨立,但睇戲食飯都係男人畀錢多,好正常。」

娛聞樂陪你走遍全球追星,即Like「娛果」FB 專頁!
BannerBanner