【打籃球會好啲?】方力申自言冇女埋身 呻細個揀錯運動項目

更新時間 (HKT): 2019.01.04 16:16
(攝影:羅慧敏)

方力申(小方) 同錢國偉今日以嘉賓身份去到灣仔,拍攝周家蔚主持嘅飲食節目,小方自爆唔識煮,只識食:「細個媽咪唔畀我入廚房,佢驚我有自己家庭嘅時候會辛苦,不過就唔係怕我要服侍老婆,而係要分工合作,一個煮一個洗碗。」

小方又讚自己平易近人:「我唔揀飲擇食,就算食煎蛋白飯都得,性格好好。」不過就笑言冇女埋身,問到佢游水咁叻係咪好吸引異性?佢話:「游水冇用㗎,追唔到女仔,唔通行行吓街跳落維港咩!讀書時學校冇泳池,田徑同球類運動就有用,可以吸引異性。」問佢有冇同之前喺日本撞車嘅志偉聯絡?小方就話:「獎門人第一時間喺group度報平安,佢話好似畀人揼完咁,周身好酸軟。」

另外,家蔚就話自己對食好有要求,佢同老公都好嘴刁,佢自爆話:「我哋係因為拍攝遊戲節目食出真感情,食嘢唔夾好難。」

娛聞樂陪你走遍全球追星,即Like「娛果」FB 專頁!
BannerBanner