【係時候享福】三代同堂賀67歲牛一 洪金寶「幸福爺爺」樣出晒嚟

更新時間 (HKT): 2019.01.08 13:36

67歲嘅武打巨星洪金寶一生為香港電影貢獻,前排仲好好火同記者感歎曾經以武打片風靡全球嘅香港,已經冇晒武打明星,新一代已經冇個打得,武打片亦買少見少。心痛香港影壇嘅大哥大早前透露,有意搵番昔日老友合作拍港產片。不過講電影講武打講到好興起嘅洪金寶,一提到孫仔即刻變晒,仲話會叫啲孫學武打,但係自己就唔會教,因為怕自己太惡嚇到啲孫唔肯見面咁話。(新聞連結: http://bit.ly/2TE7WaB)

今日大仔洪天明喺IG貼出一張全家福,原來噚日係洪金寶嘅67歲正日生日,天明留言話:「生日快樂爸爸。」而相入面除咗有壽星公洪金寶同高麗虹,天明當然同埋老婆周家蔚,仲有兩個囝囝一齊出席啦!另外,還有天明嘅細佬妹洪天祥、洪煦榆,一家八口三代同堂,羨煞旁人。

67歲嘅洪金寶出名身手靈活,加上外表威武霸氣,近年喺影壇都仲好活躍,無論幕前幕後,洪金寶都為電影貢獻所學,人到中年嘅洪金寶亦開始養生,上年十月為《如珠如寶》開工時,身型明顯消瘦,佢就話係老婆迫佢減肥:「佢話肥呀、唔健康呀,減食呢啲嗰啲,總之唔准食任何澱粉質嘅嘢。」

娛聞樂陪你走遍全球追星,即Like「娛果」FB 專頁!
BannerBanner