【亞洲電影大獎】金像獎前哨郭富城問鼎亞洲影帝 惠英紅降呢爭女配

更新時間 (HKT): 2019.01.11 17:30
郭富城影帝紅姐爭女配。

鄭秀文(Sammi)、杜琪峯、導演陳小娟同李駿碩今日喺尖沙嘴一酒店,出席第13屆亞洲電影大獎記者會,宣佈入圍名單。今年頒獎禮評審團主席會由導演兼演員嘅陳沖擔任,日本影星渡邊謙任名人評審。16個獎項中最受注目嘅自然係最佳電影、導演、男女主角同男女配角獎,郭富城憑《無雙》入圍問鼎今屆亞洲影帝,同場對手有日本嘅役所廣司、大陸嘅徐崢、南韓嘅劉亞仁同印度嘅蘭比爾卡浦爾。惠英紅憑《翠絲》獲提名最佳女配角。

Sammi接受訪問時話未睇晒所有電影,不過當然支持香港電影、演員同導演,佢話:「希望有份出戰嘅香港作品可以為港增光,自己今年增光唔到,要再努力。」對於會否會揀選高質素劇本才接拍,Sammi話:「接得嘅話當然覺得係好劇本,去年拍咗四部戲未上映,四部自己都好鍾意。」佢表示今年亦會拍攝電影,更自嘲這個年紀唔介意拍愛情小品,Sammi笑言:「當然最想同小鮮肉合作,但驚飽得滯,自己鍾意韓國男仔,唔好以為已婚婦人唔睇,眼生喺度係用嚟睇嘢,自己有時都會上網睇下邊個韓國靚仔,都係生活嘅調劑。鍾意身高、單眼皮、有肌肉。」問到Sammi所指嘅是否老公許志安,Sammi回應:「呢啲通街都係。」Sammi將安仔排除喺喜歡類型以外,佢話見到韓仔都開心,自己想同邊個合作就費事講,以免下次見到尷尬,Sammi又話除咗韓仔其實日系靚仔都鍾意,只不過可能係細粒啲。

郭富城稍後回應話:「很開心知道以《無雙》入圍亞洲電影大獎最佳男主角提名。作為一個演員,用心演好每一部電影作品,而得到任何提名或獎項,都是一份鼓勵。我希望所有鼓勵都和製作團隊分享,多謝導演莊文強、發哥和所有在《無雙》一起努力的團隊。」

至於女主角方面有港片、陳果導演《三夫》嘅大陸藝人曾美慧孜入圍,佢話:「特別激動及榮幸提名亞洲電影大獎最佳女主角,在此多謝陳果導演,給我演出機會,亦感謝評審對我的鼓勵,這是我第一次到香港拍戲,給我非常難忘的經歷,很喜歡香港,很喜歡大家。期待頒獎當天與大家見面。不見不散!」

最佳電影有大陸嘅《我不是藥神》同日本嘅《小偷家族》入圍,是枝裕和同時亦憑《小偷》一片入最佳導演,同《三夫》導演陳果爭獎。

今屆最佳新導演較矚目嘅係《屍殺片場》嘅上田慎一郎同《淪落人》嘅陳小娟爭奪。另外,今次頒獎禮將於3月17日喺將軍澳工業邨電視城舉行,到時會由TVB直播。

精選娛聞,喺晒《娛果》 http://fb.com/appledailyent

娛聞樂陪你走遍全球追星,即Like「娛果」FB 專頁!
BannerBanner