【獨家】黃澤鋒拖妻威院產檢 不擔心同孩子有代溝

更新時間 (HKT): 2019.01.17 17:38

現年51歲嘅大台前藝人黃澤鋒,2010年娶咗圈外女友陳麗麗,佢哋新婚時,黃澤鋒講過恨生仔,惜一直未有所出,估唔到皇天不負有心人,黃澤鋒噚晚喺facebook報喜,話好快會加入人父行列。黃澤鋒話今年願望成真,家中會迎接新生命到來,下月52歲牛一嘅太太陳麗麗正陀B三個月,預產期喺今年7月。

黃太陳麗麗齡係超高齡產婦,面對唔少風險,但仍為老公生B,非常偉大。黃澤鋒獲悉太太有孕,開心到爆燈,佢兩公婆向來好恩愛,經常有影皆雙,醫生叮囑黃太一切要小心,黃澤鋒立即下令老婆不准操勞,安胎大晒。黃澤鋒今日下午2點,做柴可夫載太太到沙田威爾斯親王醫院做產檢,佢拖實老婆,全程呵護備至,二十四孝好老公。

近日天氣再轉凍,但今日中午都有陽光,氣溫稍為升高,但黃太都好小心,包到冚到醫院,又戴上口罩,以防細菌。佢哋產檢由下午2點做到4點幾,足足兩個多小時,不過兩公婆都耐心等候。當離開時,《蘋果》上前恭喜,黃澤鋒夫婦開心笑唔停,問到佢哋呢次係咪人工授孕,黃澤鋒話:「唔係,我哋都冇雪卵,可能自然休息夠,最大原因我諗係太太6月辭咗職,佢休息好夠就容易受孕。其實我哋結婚頭幾年有諗生BB,但呢五、六年就冇諗,越緊張越冇,呢次有咗係好surprise,BB係上天嘅禮物。」黃澤鋒都知道太太係超高齡產婦,黃太會聽醫生說話多休息,黃澤鋒:「我仲叫佢唔好拎重嘢,佢話上樓梯都叫辛苦,我明白阿媽陀我時辛苦。」

黃澤鋒51歲先有第一胎,問佢擔唔擔心將來同孩子會有代溝?佢話:「我0依家教拳都有教細路仔,有3歲小朋友,溝通上冇困難。」家中多咗小朋友,可會打亂黃澤鋒嘅退休計劃?佢話:「呢行冇諗退休,我教拳可以教一世。」

娛聞樂陪你走遍全球追星,即Like「娛果」FB 專頁!
BannerBanner