【方媛過大海睇騷】媽咪身體變差勁感觸 城城:會更加用心愛佢

更新時間 (HKT): 2019.01.19 17:40

喺上個月宣佈老婆方媛陀住第二胎嘅郭富城,佢話老婆生咗囡囡Chantelle嘅時候,喺開平拍緊戲,當佢知道老婆生咗,於是乎即趕返香港,不過今年城城話上半年主力做巡唱,會易就啲。(新聞連結: https://bit.ly/2PV442p )城城噚晚去咗澳門做巡迴演出,除咗有圈中人撐場睇騷之外,當然仲有老婆方媛,今次方媛好大方咁坐喺觀眾席睇騷,仲喺Ig拍片share老公台上嘅演出!

唔知係咪做咗爹哋,喺做人處事嘅感受特別深,尤其係體驗到做父母嘅辛苦,城城喺台上講到自己嘅成長,10歲嘅時候,媽咪依然會孭佢,就算已經成家立室,但係仍然對佢呵護備至,城城最初話:「我媽咪真係好錫我,我好開心o依家有個幸福家庭,有個寶貝女,我可以從一而終努力工作,做好爸爸、好丈夫。」點知講講吓城城有啲哽咽話:「人大咗,時間過得好快,媽咪身體唔好,我會更加用心,用任何性質愛我媽咪,希望我親愛嘅媽咪身體健康。」

城城喺完騷後接受訪問,講到媽咪嘅身體情況,佢話之前係有啲擔心,不過o依家已經好番,佢仲話:「我好鍾意做演唱會,因為可以做番自己,做咗爸爸知道要湊大一個小朋友,真係唔容易嘅事,我有五兄弟姊妹,突然間諗起媽咪,睇住媽咪身體一路差,以前佢會嚟睇我嘅演唱會,但係o依家就算扶佢,都可能冇精神睇,所以諗吓諗吓,嗰一刻諗到媽咪,如果冇佢就唔會有我!」城城仲話今年農曆年可以同屋企人度過,預計4月先會開工拍電影。

娛聞樂陪你走遍全球追星,即Like「娛果」FB 專頁!
BannerBanner