【流感肆虐】 未等教育局宣佈已禁女返學 梁詠琪:唔可以輕視病菌

更新時間 (HKT): 2019.01.20 14:52
攝影:仇志德

梁詠琪(GiGi)、潘源良同太太Rita、林日曦、湯沛宜、林兆霞等,噚晚去咗旺角麥花臣場館睇talk騷《翔揸劉灘之潮潮的吹》,GiGi話上次因為工作而錯過咗,所以今次特別到場支持,佢話:「彭導好有才華,又醒目,我好想睇佢點樣發揮創意同幽默感。」有冇興趣做talk騷?佢話:「我驚dead air,同開演唱會好唔同,我雖然有幽默感,但係我係接收嗰個而唔係發揮,因為我嘅笑點幾低。」問到會唔會想同幾個姊妹楊采妮、李心潔同許茹芸一齊開騷?GiGi笑話:「我哋啲話題好鬼正經,我驚悶親觀眾。」

講到農曆新年,GiGi表示會喺香港過年:「生完阿女之後,會好珍惜每年喺香港過新年,因為我哋會依照傳統同屋企人見面,小朋友大得好快,見少一年,再見又爭好遠,佢今年開始已經再唔係一嚿飯,已經3歲幾,所以佢知道發生咩事,啱啱過咗聖誕節,西班牙嘅三皇節。佢已經知道習俗,我有教佢講恭喜發財,所以佢今年拜年嘅表現應該唔錯。」

提到流感肆虐,GiGi指教育局宣佈停課之前,已經唔畀囡囡返學:「唔可以輕視病菌,尤其係3、4歲嘅小朋友,佢哋嘅衞生意識係爭好遠,我哋就喺屋企同阿女做親子活動。」多咗好多相處時間?佢笑話:「其實佢平時返學都係3個鐘,打個白鴿轉就接放學。」

另外,彭浩翔、鄒凱光(灘叔)同劉翁主講嘅《翔揸劉灘之潮潮的吹》,由演藝學院轉到旺角場演出,劉翁話:「嚟到旺角又想講番啲旺角嘢,頭先扮古惑仔係好旺角。」佢哋都覺得同上次好唔同,彭浩翔話:「今次個場大咗好多,演出上嘅力度又唔同咗。」灘叔就話:「原來香港區同九龍區真係有分別,香港區嘅人係斯文啲,呢邊嘅人係狂野啲,會爆笑出嚟,但呢班人都係喺香港區過嚟。」鍾意喺邊區做?灘叔笑住話:「18區都做晒,做到入長洲。」

佢哋希望今年內可以再開,但可惜好難book場,會唔會以紅館為目標?彭浩翔話:「一步一步嚟,伊館先。」灘叔即刻話:「其實佢(彭浩翔)唔記得咗,有外地嘅人搵我哋做巡迴,但佢怕坐長途機,唔肯去大西洋城。」叫彭浩翔早啲坐船去?佢哋笑話:「都可以喺船上做住先喎,當係排練,搶家燕姐生意。」

娛聞樂陪你走遍全球追星,即Like「娛果」FB 專頁!
BannerBanner