【隔空搵吳孟達】張栢芝產後現身 為周星馳新戲廣州站台

更新時間 (HKT): 2019.01.21 17:36
(微博圖片)

生完第三胎嘅張栢芝,早前喺周星馳導演嘅新戲《新喜劇之王》中特別聲演後(相關新聞︰ http://bit.ly/2RvPPHa),噚日栢芝再次出動,為星爺嘅新戲站台,出席全國巡迴宣傳廣州首站嘅活動。噚晚周星馳帶領住《新》戲嘅演員王寶強、鄂靖文等,去到廣州長隆出席電影宣傳活動,特別嘉賓就係有份聲演嘅張栢芝。

現場播出當年星爺同栢芝一段「我養你啊」嘅經典戲,最搞笑係現場重演呢一幕,仲要係王寶強同張栢芝版嘅「我養你啊」,由於一個講國語,一個講廣東話,有點格格不入,但仍能令全場爆笑。相隔20年重新再拍小人物故事,星爺喺現場話︰「我自己本身就是小人物,做起來也很高興,很熟悉。」而之前佢接受大陸傳媒訪問時,提及到《新》戲算係「女版尹天仇」,不論廿年前定廿年後,都有一班像尹天仇嘅年輕人,而星爺想通過電影同佢哋分享感受。

至於吳孟達早前提到同星爺「老死都不相往來」(相關新聞︰ http://bit.ly/2F8X7Ju),不過星爺對此冇乜在意,仲喺現場隔空邀請吳孟達,佢話︰「我之前有找他拍戲,但他當時身體有點不舒服,往後我會繼續努力,有戲再找他合作。」

娛聞樂陪你走遍全球追星,即Like「娛果」FB 專頁!
BannerBanner