【少婦聯盟傾到凌晨】摸陳凱琳孕肚沾旺氣 龔嘉欣:希望笑聲冇嘈親鄰居

更新時間 (HKT): 2019.01.22 14:49
少婦聯盟提早食團年飯,吹水傾到凌晨兩點。Ig圖片

陳凱琳同鄭嘉穎今年迎接佢哋嘅B仔出世,目前陀B嘅陳凱琳生活幾寫意,一時出席商場活動、一時就約好姊妹見面,陳凱琳今午貼出「少婦聯盟」合照,原來佢同譚凱琪、龔嘉欣同沈卓盈噚晚約埋打邊爐,趁農曆新年前相聚。

見佢哋喺Ig story貼出成枱美食嘅片,陳凱琳就留言:「同姊妹一齊預祝大家豬年快樂!希望今年可以好似豬仔咁:又食得,又瞓得!」佢仲話每次聚會都有笑點,沈卓盈則喺Ig貼出佢哋摸陳凱琳肚嘅相,笑言要摸下靚媽媽個肚仔沾啲旺氣,而譚凱琪笑言提早食團年飯,大家都不忘美肌,原來係當晚佢哋傾偈嗰陣,仲一齊敷面膜,認真貪靚。

龔嘉欣亦喺Ig貼相,寫道:「團個年~迎豬年!見得咁密嘅,今次又傾到兩點,由六點半到兩點,希望我哋嘅笑聲冇嘈親鄰居啦,仲有指定動作,摸一摸肚仔,沾一沾旺氣先。」

娛聞樂陪你走遍全球追星,即Like「娛果」FB 專頁!
BannerBanner