【狗仔出更】黃昏戀一樣可以浪漫 陳榮峻拖實吳香倫行街甜到漏

更新時間 (HKT): 2019.01.23 00:00

現年63歲嘅陳榮峻,舊年同58歲吳香倫發展嘅黃昏戀開花結果,兩個人去年7月喺一間教堂舉行婚禮,陳榮峻嘅媽媽、子女同孫仔四代同堂出席,真係戥佢哋開心。

咪以為佢哋結咗婚又一齊咁多年就唔再浪漫,日前《蘋果》記者喺圓方撞見陳榮峻同吳香倫兩公婆,佢哋又玩自拍又十指緊扣行街,畀人感覺真係甜到漏呀!

當日下午4點左右,陳榮峻同吳香倫喺圓方商場出現,同行仲有一位女友人,陳榮峻着住件黑色有紅色花花嘅外套,吳香倫就着住藍色恤衫襯牛仔褲同挽住個紅色袋,牛仔褲度仲有啲花花,同老公打扮好相襯。佢哋一行人見到商場嘅新年佈置,都忍唔住自拍影相留念,跟住陳榮峻一手拖住老婆行去搭扶手電梯,就算搭緊電梯,佢都係拖實老婆,然後同女友人拜拜後,兩公婆去停車場攞車離開。

記者日前問番陳榮峻,原來當日佢同吳香倫啱啱做咗雜誌嘅情人節專訪,嚟緊情人節係陳榮峻同吳香倫結婚後第一個情人節,相信陳榮峻到時會識做畀啲驚喜氹老婆開心嘅。

【編輯推介】

娛聞樂陪你走遍全球追星,即Like「娛果」FB 專頁!
BannerBanner