【評價一般】觀眾留負評 《皓鑭傳》製作人:錯的是導演編劇與演員

更新時間 (HKT): 2019.01.23 14:44
(網上截圖)

吳謹言、秦嵐同佘詩曼演出嘅《延禧攻略》,舊年播出之後紅爆中港台,製作人于正食住個勢,搵咗吳謹言、聶遠等原班人馬開拍《皓鑭傳》,呢套劇上周六喺愛奇藝開播,而無綫買咗播映權,安排喺下月4號播映。話晒有《延禧攻略》嘅餘威,再吳埋吳謹言嘅人氣,唔少觀眾準備煲劇,點知出咗街之後,即刻負評如潮!

先係有網民批評吳謹言嘅演技,「連母親死都哭不出眼淚」、「一如以往地面癱」等,身為製作人嘅于正當然力撐,仲話因為人喺突然遇到突發狀況時,大腦會唔願意接受呢個訊息,正如張曼玉喺《甜蜜蜜》嘅其中一幕,見到曾志偉嘅屍體,佢都係先笑再喊,結果又激發另一種負評,有人留言話「居然拿張曼玉做對比,你是認真的嗎」、「張曼玉在甜蜜蜜裏的表演可不僅僅是先笑後哭這麼簡單」(新聞連結: https://bit.ly/2RHdSTv )。

《皓鑭傳》喺網上已經播到第16集,不過網民嘅評價仲係一般般,有人覺得故事情節同《延禧攻略》相比,一來節奏唔明快,二來戲服同佈景亦唔夠華麗,噚晚于正又更新微博:「我發現自己再怎麼努力,都改變不了劇開播3分鐘數百一星開跑的命運,《延禧攻略》如此,《皓鑭傳》也如此。我原以為《延禧》之後可以改變這個『於一星』的命運,但《皓鑭傳》仍然讓我清醒地認識到自己的宿命,我可以讓劇火,讓明星火,甚至讓劇在香港火,在新加坡火,在日本火,但讓開播的『一星』變『五星』,臣妾依然『是做不到啊,做不到啊』。」

唔知係咪為咗平息將吳謹言同張曼玉相提並論嘅言談,于正今次將問題歸咎喺自己身上:「我今天想通了,就出在我自己!觀眾永遠沒有錯,錯的都是導演編劇與演員。打分是觀眾的權利……你不能改變所有人,只能改變自己……唯一的懇求就是打完一星後,請繼續罵,請繼續批,但罵他十句後,也留下一句這劇到底不好在哪裏,到底哪裏還需要改進。」之後佢又再話:「在看大家最新的評論,受益良多。我決定在豆瓣一星到五星評論中抽出30條『說得在理,講得到位,罵得最狠,教得最深』的評論,並給予獎勵,謝謝大家指正!」

娛聞樂陪你走遍全球追星,即Like「娛果」FB 專頁!
BannerBanner