【2019生肖運程】王浩信、陳豪屬豬犯太歲 麥玲玲建議一喜擋三災

更新時間 (HKT): 2019.01.29 00:00

大家準備好送狗迎豬未?新一年就快到,人人都期望明年會更好,《蘋果》邀請香港著名堪輿學家麥玲玲師傅為大家指點迷津,一齊睇睇2019豬年運程,今年邊個生肖最好,如果運程麻麻的朋友,又有甚麼趨吉避凶的好方法?!

第一集,會為大家講解屬豬朋友的豬年運程,麥玲玲預測:

「屬豬嘅朋友嚟到豬年,係犯本命年,犯本命年係犯太歲嘅一種,中國人話太歲當頭坐,無喜必有禍,犯太歲年份係需要喜事沖喜,所謂一喜擋三災。建議年份入面,多以喜事沖喜,傳統大喜事,包括結婚、添丁、買樓呢三件事,能做以上三件事當然係最好,如果冇打算安排,要有心理準備係比較動盪嘅年份。

今年有歲駕星,係代表皇帝出巡嘅星,有呢個星,代表你表現仍然唔錯,事業運尚算可以,反而要留心健康,今年有劍鋒星,代表係金屬受傷,開車嘅朋友一定要注意一下,或平時成日要接觸金屬都要好小心。同時過咗年之後,捐吓血、洗吓牙,一定對個健康有幫助,或少少裝修屋企都係得。

仲有,今年係容易胡思亂想、情緒低落嘅年份,要接觸吓大自然,多做運動。而今年感情運都係波動啲,結婚當然最好,唔係今年踏入關口年,容易嗌交同分手,連籌辦結婚都容易爭吵。如果屬豬嘅朋友,想今年好啲,可以佩戴一啲飾物,豬本來同老虎係好朋友,但老虎自己都犯太歲,自身難保,所以今年戴兔仔加羊飾物最啱。」

屬豬藝人代表﹕王浩信、苟芸慧、黎姿、陳豪(1947、1959、1971、1983、1995、2007、2019)

娛聞樂陪你走遍全球追星,即Like「娛果」FB 專頁!
BannerBanner