【三代同堂】擔心Emma綵排勁緊張 鄭中基:點知佢好輕鬆

更新時間 (HKT): 2019.01.30 17:13
Ronald開騷,連太太余思敏都要開金口!

鄭中基(Ronald)將於下月4日在紅館舉行演唱會,距離開騷日子只有5天,Ronald坦言心情緊張又興奮,因為今次囡囡Emma同爸爸鄭東漢做表演嘉賓,屆時三代同堂齊齊表演,Ronald笑說:「今次係Emma自己揀歌,爸爸(鄭東漢)負責彈結他,本來同Emma綵排,我以為佢會緊張,仲諗咗好多方法安慰佢,點知好輕鬆,搞到我都唔知點算好,而家全部用唔到。不過OK嘅,大家嚟睇吓佢表演成點喇!」

其實不單止Ronald,媽咪余思敏亦很緊張,早前囡囡考試未能參與綵排,媽咪開金口代唱錄demo,讓囡囡在家一邊聽一邊練習。另一方面,Ronald早前為自導自演的電影《阿龍》,谷肌增重至168磅,不過為了今次開騷,又要進行地獄式減肥,他說:「而家幾成功,去番140磅左右,目標係138磅,講意頭『一生發』,除咗做運動,喺飲食方面都要落啲苦功。」但因為目前時值流感高峰期,Ronald表示做足防護措施:「戴口罩,少去人多地方,食多啲生果、做多啲運動增強抵抗力。」

至於其他表演嘉賓,Ronald坦言:「適逢過年,好多朋友都出埠,要碌呢張人情咭真係唔容易,好彩幾經辛苦都請到,大家唔使擔心。」Ronald亦搞笑地說:「所以大家記得帶錢,上一次以為我派利是,其實係你哋派利是畀我㗎!」

娛聞樂陪你走遍全球追星,即Like「娛果」FB 專頁!
BannerBanner