【人魔大戰後捲格鬥】巴士阿叔疑阻人上車撩隻揪 35E巨胸迪子打999

更新時間 (HKT): 2019.01.31 19:00
迪子目擊巴士阿叔和乘客衝突事件(網上短片截圖)

近日網上瘋傳一條巴士阿叔疑阻人上車短片,在一輛由筲箕灣往美孚的N122號通宵巴士上,一名被指阻人上車的阿叔,跟乘客口角後撩人隻揪,幾乎上演一場巴士格鬥!原來當時35E巨胸歌手、曾被大台藝員黃子恆約玩「人魔大戰」的迪子都在場,迪子更致電999報警,有其他網民拍下情況將短片放上網。

迪子接受《蘋果》電話訪問還原事件經過,指事發於前日(29號)凌晨近2點,地點在旺角警署附近,迪子說:「其實件事開端係好小事,嗰個阿叔上車之後,唔知點解企喺門口,車門有個扶手,但唔係畀人扶住,阿叔企喺度扶住扶手,司機就叫佢唔好企門口,阿叔可能唔畀人話得,同司機頂咗兩句,其實中間司機鬧佢,佢都死死地氣企番黃線後面,但可能司機睇唔到,埋站後停車,叫佢企番好先開車。」

目擊整個過程的迪子,認為巴士司機都有責任:「其實我企喺阿叔最近嘅地方,見到晒成個過程,停車時佢真係企喺黃線後面,所以我冇埋去話佢,因為佢已經企番好啦,不過可能司機畀佢話咗兩句,唔係幾開心,停咗架車喺度,唔肯開車唔肯上客,當時巴士入面好多人,乘客鼓譟,你玩到唔肯開車,大家都趕住返屋企。」

之後有位乘客衝上去,問阿叔:「係咪玩嘢?」迪子說:「阿叔覺得自己已經企番黃線後面,你又挑釁我,咪同佢嘈交,當時我都想埋去做緩和嗰個,不如叫阿叔企後少少,後面仲有位,但當時佢哋嘈交,咁我話報警,所以我落咗車報警,因為我要睇當時巴士嘅位置同車牌號碼,我落咗車畀資料警察時,佢哋喺車裏面已經想打交,係圍毆嗰隻,我即刻喝止佢哋話報咗警,跟住上返車想控制大家情緒,我覺得其實好小事,喺警察嚟之前唔想佢哋郁手,大家目的都係趕時間返屋企。」

娛聞樂陪你走遍全球追星,即Like「娛果」FB 專頁!
BannerBanner