【子華現身支持】隔26年再合作 袁詠儀為青雲客串:期待做情侶或夫妻

更新時間 (HKT): 2019.01.31 14:00

張家輝、劉青雲、袁詠儀和林嘉欣昨晚在九龍灣出席電影《廉政風雲 煙幕》首映禮,今次是袁詠儀與青雲相隔26年再合作,她說:「其實我好少客串,今次主要同青雲有對手戲,而且我睇完劇本覺得角色好得意、好好玩,所以咪做囉,好期待將來有機會同青雲再做情侶或者夫妻。」她笑說:「明明好似係噚日嘅事,大家都仲係好後生,不過青雲除咗比以前成熟穩重之外,依然係冇乜嘢講。我哋合作咗咁多次,加埋都講唔夠十句嘢,仲包括埋食咗飯未呀?食咗喇!呢啲咁簡單嘅說話!」

青雲、家輝和嘉欣表示今次合作很開心,雖然青雲笑稱羨慕他們去澳洲拍外景拍足一個月,不過家輝說:「我反而妒忌佢,喺香港拍完戲就可以返屋企,你估住一個月酒店好好玩呀?始終最好都係瞓番自己張床!」青雲坦言再見到靚靚,有一種與女友重逢的感覺!

家輝在戲中有不少在雪山滑雪的戲份,問到有否驚險事,他說:「喺滑雪嗰陣跌低咗,自己唔知連手提電話都跌埋,返到酒店見到件衫爛咗先知道,好彩有人執到,仲拎埋去酒店畀番我。」他們期待可以開拍續集,問到青雲會否希望出埠拍外景?他說:「其實出埠係冇問題,只係最擔心住酒店會有麻煩事,好似宣傳嘅時候,幾乎係晚晚換酒店,要適應房間嘅設施,尤其係燈掣,你知熄晒啲燈未必去到洗手間,而且太黑又冇安全感,次次都搞咗好耐!」嘉欣亦說:「我出埠一定會帶眼罩,戴咗眼罩就好似熄咗掣,唔會畀其他嘢影響!」

娛聞樂陪你走遍全球追星,即Like「娛果」FB 專頁!
BannerBanner