【2019生肖運程】馬國明屬虎吉中藏凶 做人做事低調啲

更新時間 (HKT): 2019.02.01 00:03

大家準備好送狗迎豬未?新一年就快到,人人都期望明年會更好,《蘋果》邀請香港著名堪輿學家麥玲玲師傅為大家指點迷津,一齊睇睇2019豬年運程,今年邊個生肖最好,如果運程麻麻的朋友,又有乜趨吉避凶的好方法?!

第四集,會為大家講解屬虎朋友在豬年的運程,麥玲玲預測:

「屬虎嘅朋友嚟到豬年,關係比較複雜,老虎同豬本來係好朋友,我哋叫合太歲,但當中又有破太歲嘅關係,所謂嘅合中有破,即係話吉中藏凶。屬老虎嘅朋友,今年有七成係唔錯,但三成就麻麻哋,同時呢個破係犯太歲嘅一種,我哋做嘢、做人、做事都要低調啲,小心啲。」

「今年好在有太陰星照住,太陰都係一個女性嘅貴人星,有呢個星,年長嘅女性對我哋幫助係好大,太陰亦係財星,但財不入急門,呢個星係慢慢嚟,呢個女性貴人星亦帶動我哋嘅桃花運。屬虎嘅男孩子,今年嘅桃花運尚算唔錯,不過呢個女仔好大機會係大你少少,如果你唔介意姊弟戀,呢段感情係可以開展。

同時有國印星,國印係代表掌管權力嘅帥印,有呢個星權力係增加咗,不過人工未必加得好多。歲合係代表應酬,今年好多人搵你合作,但破太歲年份,千祈唔好太進取,仲有貫索星,呢個星代表金錢糾葛,所以今年投資都係以保守為上。

今年易整傷手腳,尤其膝頭哥、腰骨更要注意一下,喜歡做運動嘅朋友要格外提防。老虎本身同豬係合生肖,但豬犯本命年,惟有佩戴狗或馬去催旺番自己。」

屬虎藝人代表﹕馬國明、王君馨、周星馳、陳奕迅、薛家燕(1950、1962、1974、1986、1998、2010)

精選娛聞,喺晒《娛果》 http://fb.com/appledailyent

娛聞樂陪你走遍全球追星,即Like「娛果」FB 專頁!
BannerBanner