【2019生肖運程】朱晨麗、佘詩曼屬兔小心感情紛爭 麥玲玲﹕容易疑神疑鬼

更新時間 (HKT): 2019.02.02 00:03

大家準備好送狗迎豬未?新一年就快到,人人都期望明年會更好,《蘋果》邀請香港著名堪輿學家麥玲玲師傅為大家指點迷津,一齊睇睇2019豬年運程,今年邊個生肖最好,如果運程麻麻的朋友,又有乜趨吉避凶的好方法?!

第五集,會為大家講講屬兔朋友在豬年的運程,麥玲玲預測:

「屬兔嘅朋友嚟到豬年,恭喜你哋,係相當唔錯,因為兔同豬本身係好朋友,所以都係開心年份。兔仔經歷兩年犯太歲,一年沖太歲,一年合太歲,嚟到呢年終於好啲。」

「今年有三台星,三台代表步步高昇,好似樓梯階咁,今年無論感情、財運同事業運都有向上空間。另外仲有將星,呢個係領導才能嘅星,代表要出去打仗,如果你做開紀律部隊,如警察、消防、海關,今年算係做得相當唔錯,可以發揮到。

除咗事業星旺之外,今年提防容易有官非,今年有官符星,呢個星代表容易簽咗一啲文件,所以逢文件、合約我哋要請教專業人士,同埋無論去外地,本身揸車嘅朋友記得奉公守法。

而五鬼星,代表成日疑神疑鬼,感情上容易有紛爭,或你懷疑對方,記得坦承相向。其實兔仔今年事業運都唔錯,有進步空間,感情又有少少進步,屬開心一年,兔仔同狗仔係好朋友,我就建議今年佩戴一隻狗助旺一下自己。」

屬兔藝人代表:佘詩曼、湯洛雯、朱晨麗、黃德斌(1951、1963、1975、1987、1999、2011)

精選娛聞,喺晒《娛果》 http://fb.com/appledailyent

娛聞樂陪你走遍全球追星,即Like「娛果」FB 專頁!
BannerBanner