【慢半拍】警察公共關係科自度《車公有嘻哈》 麥玲玲:原創作凡人係Rap唔到

更新時間 (HKT): 2019.02.05 19:38

【新增影片】

「玲玲出嚟又睇掌喇......」堪輿學家麥玲玲Rap歌已經不是新鮮事,08年與農夫合作過Hip Hop歌《風生水起》,最近重施故技,但不是與歌手合作,而是幫警察公共關係科(PPRB)「做嘢」!

今日PPRB在facebook專頁、IG、微博等社交平台上載了一段名為「車公有嘻哈」短片,出場時「車公升級報道員阿俊」叫玲玲師傅贈兩句,玲玲以Rap形式呼籲市民到車公廟拜神,最好不要自己駕車,因為泊位好難,建議使用公共交通工具,基本上唱得都好押韻易記。

不過,《蘋果》之後在網上又發現另一個男聲版本,內容與《車公有嘻哈》雷同,但個beat似乎就慢咗半拍。一開頭「我我 講啦 好聽啦 要嚟 車公廟請注意 拜神」每個位停頓半拍,押韻字離不開「啦、嚟、㗎、呀」,而男聲本身較低沉,似喃嘸多過似Rap歌,十分搞笑。

《蘋果》今日都有聯絡玲玲師傅,她坦言男聲是原聲帶,她說:「原聲其實有存在,初初聽呢個demo我都嚇咗一跳,我知佢哋(PPRB)唔係專業,亦都好努力去做,但嗰段原創作,凡人係Rap唔到,我都即刻問相關同事,『吓,呢個真係叫Rap?』,咁佢哋都有努力改一改。」玲玲擔心最終效果未如理想,最後親自找舊拍檔陸永幫手,她說:「陸永話唔好改喇,都改唔到,重新做過啦。」

玲玲透露PPRB都有盡最大努力修改,她說:「來來回回都改咗一個較好嘅版本,冇原先慢咗九拍咁嘅,但最後都係陸永出手,順暢好多。原本嗰個都係用心去做,好有喜劇感,可能係另一個效果啫。」

問到有沒有收取酬勞?玲玲說:「通常同市民大眾或有關政府嘅嘢,我哋都唔會收酬勞㗎。」

娛聞樂陪你走遍全球追星,即Like「娛果」FB 專頁!
BannerBanner