【2019生肖運程】屬羊代表梁競徽、麥明詩 麥玲玲:有白虎凶星,小心惡女人

更新時間 (HKT): 2019.02.06 00:10

新年快樂!今日年初二,剛踏入豬年,人人都期望新一年會更好,《蘋果》邀請香港著名堪輿學家麥玲玲師傅為大家指點迷津,一齊睇睇2019豬年運程,今年邊個生肖最好,如果運程麻麻的朋友,又有甚麼趨吉避凶的好方法?!

第九集,會為大家講講屬羊朋友在豬年的運程,麥玲玲預測:

「屬羊嘅朋友嚟到豬年算相當唔錯,羊本身同豬係好朋友,當你同太歲係好朋友,做嘢自然順利啲。而且羊喺狗年曾經犯太歲,好多屬羊朋友嘅身體、感情都有啲阻滯同波折。」

「今年吉星唔算多,只有華蓋星,華蓋係藝術才華嘅星,如果你從事創作、廣告或寫劇本,相對今年可以話靈感不絕。但華蓋本來係代表皇帝出巡時嘅天蓋,羅傘好靚,但就好孤單,華蓋本身係不利感情,代表獨行獨斷同孤芳自賞嘅意思,如果冇拖拍想今年搵伴侶嘅話,仍然有啲難度。

另外,我哋仲有凶星白虎星,白虎代表好惡嘅女人,今年遇到嘅女孩子都係脾氣唔好,如打工一族,老闆係女仔會好挑剔,因為係一個無理取鬧女性嘅星,今年惟有忍讓一下。

但有華蓋星,去進修係可以,除代表藝術才華,讀書都係唔錯,只係比較孤單少少。今年喺心情上係寂寞啲啲,不妨多接觸大自然,或上堂進修一下。羊同馬本身係好朋友,為加強自己貴人運同朋友運,建議今年佩戴一個馬形飾物。」

屬羊藝人代表:陳凱韻(甘比)、何超蓮、陳凱琳、麥明詩、梁競徽(前名﹕梁烈唯)、林盛斌(1955、1967、1979、1991、2003、2015)

精選娛聞,喺晒《娛果》 http://fb.com/appledailyent

娛聞樂陪你走遍全球追星,即Like「娛果」FB 專頁!
BannerBanner