【首次開個唱】嘆連收花機會都渺茫 Aka情人節決定摺埋

更新時間 (HKT): 2019.02.13 14:24

趙慧珊(Aka@Super Girls)昨晚在灣仔舉行迷你演唱會,她於2月15生日,開騷前大會特別送上蛋糕預祝,大會驚喜送上Aka偶像容祖兒預先錄影片段,令Aka感動流淚,片中Joey鼓勵Aka努力建立更多自信心,同時祝福她生日快樂。Aka變成喊包多謝Joey,並說:「Joey係一位好好前輩,畀好多鼓勵同信心我,見到佢係一個好成功嘅例子,自己都朝住呢個方向,對我嚟講好大鼓勵。」之後唱出《隆重登場》打頭陣。

昨晚是Aka首次個人演出,極度緊張,她農曆年前患上甲型流感失聲,加上氣管敏感咳嗽,要食類固醇和特敏福治療,但副作用厲害。為今次演出,前晚緊張到失眠,她說:「媽咪見我唔舒服,又止咳水、羅漢果水、潤肺湯、八仙果等,多謝家人對我嘅關懷。農曆年返咗澳門一日食開年飯,玩放煙花燒炮仗,新年唔敢大吃大喝,為咗呢個騷唔敢出街,擔心會再病,幾日假期只係好好休息。」而昨晚算是試水溫,目標希望下次可以在大型場館開騷。

Aka表示情人節冇節目,而翌日15號就是她的32歲生日,她說:「我叫朋友一齊倒數,但佢哋睬我都儍,身邊朋友喺情人節都有安排,冇人理我,惟有去跑步算啦,情人節街上見到愛人一對對,又收花同禮物,我出街畀人望到都好異相,都係歸家度過啦,希望今個情人節有花收,但機會渺茫。」

娛聞樂陪你走遍全球追星,即Like「娛果」FB 專頁!
BannerBanner