【馮仁昭四圍超】與Baby同奪殊榮
古仔最有魅力時「喺屋企間房」

更新時間 (HKT): 2019.02.14 05:20
古仔話唔會對住塊鏡覺得自己好靚仔,除非有精神病。

古天樂、楊穎(Angelababy)、林家棟、蘇麗珊、余安安同凌文龍等前晚到尖沙嘴出席「香港專業電影攝影學會31週年晚宴」,古仔同Baby獲大會頒發「攝影師眼中最具魅力男、女演員」獎。Baby講到得獎感受:「攞呢個獎係背負少少偶像包袱,𠵱家鍾意影相,因為有咗小朋友之後經常拍片、影相,好想做攝影師。」

「麻麻哋鍾意照鏡」

問到點樣先可以有魅力?古仔話:「唔係單一個演員講,係整個劇組合作,拍一部戲要做好每一個崗位,通過美術、打燈、角度等,造就一個魅力角色。」覺得自己邊部份最有魅力?佢話:「可能喺屋企間房,冇人見到乜都得,唔會對住塊鏡覺得自己好靚仔,除非有精神病,咁要睇醫生食藥,自己麻麻哋鍾意照鏡,因為成日拍戲已經睇到自己個樣。」古仔仲講笑話覺得最有魅力就係《星戰》(Star Wars)嘅黑武士,不過見唔到樣。

家棟考慮演跨性別

林家棟一頭亂髮加滿面鬍鬚現身,佢透露應新戲導演要求下個月會到雲南生活一個月:「體驗當地人生活,學好普通話,同埋考慮緊接拍一齣新戲,飾演一個跨性別變性角色,角色係一個馬來西亞變性人。」家棟又會監製一部關懷老人題材嘅電影,搵咗一個佢好尊重嘅前輩做主角:「我要跪地求佢演出,劇本籌備咗三年。」

娛聞樂陪你走遍全球追星,即Like「娛果」FB 專頁!
BannerBanner