【大哥大!】執導過第一部戲後唔做英雄 洪金寶:留返畀我條𡃁成龍去做

更新時間 (HKT): 2019.02.26 19:01

洪金寶、郭富城、梁家輝、余香凝及杜琪峯,今日去到尖沙嘴出席「第43屆香港國際電影節」記者會,電影節由3月18日至4月1日,張家輝、任賢齊主演的電影《沉默的證人》成為開幕電影。今屆電影節焦點人是在影壇份量十足的洪金寶,電影節精選十部洪金寶作品,同時洪金寶會出席講座,與觀眾交流分享。其他蒞臨香港的有兩屆奧斯卡最佳外語片得主,伊朗大師阿斯加法哈迪,南韓導演李滄東及姜文導演等。

洪金寶表示很享受做導演,洪金寶笑言:「只有導演先至可以喺同一時間鬧800幾人,而佢哋又聽你鬧,導演可以控制所有嘢,係整齣戲嘅靈魂,而且導演片酬高啲。」洪金寶表示執導過第一部戲之後,已經給予新人機會,他說:「自己唔係英雄主義,英雄主義留返畀我條𡃁成龍去做,後生要有機會去表達新一代嘅思想,我拍嘅通常都係群戲。」洪金寶通過今次電影節會分享拍戲的甜酸苦辣,他指最甜當然是完成拍攝後,在戲院享受觀眾的笑聲及掌聲。

梁家輝指洪金寶是其眼中的大哥大,但沒有英雄主義,梁家輝笑言:「佢條𡃁就有,我都慶幸係佢其中一條𡃁。」今年電影節評審之一梁家輝指出,業內後起之秀好重要,要好好培訓新人,他在台上說:「好似而家奧斯卡都開始冇乜面,要輪到我哋香港電影(努力)。」梁家輝解釋奧斯卡是一個比喻,他說:「全世界電影業都欠缺第二,荷李活仍處於高端電影界,但只能靠特技,最近奧斯卡嘅影帝,係邊度人都冇人知,有幾多觀眾睇過同認識?」

郭富城於今屆電影節獲邀擔任電影節大使,郭富城分享,首屆電影節在他10歲時出現,近10多年他專注電影崗位,去年拍攝4部電影,今年上半年會先沉澱,挑選適合的劇本, 對於梁家輝提醒郭富城要承擔承傳角色培育新人,郭富城說:「我一直好支持新導演同演員,自己都做過新人,知道需要有機會同學習,自己希望有機會都同學生多啲交流。」

娛聞樂陪你走遍全球追星,即Like「娛果」FB 專頁!
BannerBanner