【幸福人妻】崔嘉寶退出娛圈23年後為鍾淑慧復出 大仔踢港超聯好叻仔

更新時間 (HKT): 2019.03.03 17:40

許志安初戀女友、86年參選港姐入行的無綫前花旦崔嘉寶,曾是無綫力捧花旦,88年跟郭富城、邱淑貞、李中寧、李婉華等被捧為「銀河十星」,代表作包括《金牙大狀》、《火玫瑰》和《情濃大地》等等。不過,崔嘉寶自95年拍完《情濃大地》後便息影嫁人,與晨曦足球隊班主之一的周文曦結婚,並生下三子女,婚後專心相夫教子,做幸福人妻。

雖然崔嘉寶現年51歲,且是三子女之母,但因多年來勤做運動,最愛跑步健身,因此保養得宜,身形樣貌比年青時一點也不輸蝕。

不過,退出娛圈23年的崔嘉寶,昨晚為好友鍾淑慧重出江湖,復出舞台,演唱了《你為了愛情》。

《蘋果》今日致電崔嘉寶,她說:「今次純粹友情客串,因為我幾個好朋友鍾淑慧、吳岱融、王綺琴,佢哋喺馬來西亞參與一個慈善騷,主辦單位又係我哋好朋友嚟,知道係一件好有意義嘅事,所以我就客串,始終我有成23、24年冇踏出舞台,冇面對過觀眾,所以都有啲緊張嘅,我做個特別嘉賓㗎啫,去支持呢件咁有意義嘅事。」問她有否興趣復出幕前時,崔嘉寶說:「睇情況啦,因為我啲仔大女大啦,而家比較清閒嘅,睇吓時間、睇吓劇本,如果機緣成事嘅,都可以諗吓,睇吓仲有冇人記得我啦。」

崔嘉寶大仔周志仁現年21歲,二女雅雯19歲,而細仔志賢今年亦已17歲,三子女遺傳了爸爸基因,生得相當高大,其中細仔現時跟父親一樣有6尺1寸身高。原來,崔嘉寶大仔周志仁去年已成為足球員踢港超聯,現為夢想FC正選球員,跟父親一樣同樣熱愛足球運動。對此崔嘉寶說:「因為我老公好鍾意踢波,所以兩個仔未識行嗰陣已經喺波場打滾,喺波場學行,自細好鍾意踢波嘅,呢個都係佢哋夢想,作為媽咪嚟講,當然係希望佢哋以讀書為重啦,學業都好緊要,咁佢學業之餘有時間可以踢到港超聯,我都好支持佢做呢件事,呢個係一個健康運動,佢踢咗港超聯之後,生活都健康咗好多,全屋企人都好支持佢嘅。」

此外,吳岱融、歐瑞偉、王綺琴和鍾淑慧昨晚在大馬演出慈善騷,期間吳岱融與歐瑞偉合唱一曲《倚天屠龍記》,而吳岱融與太太台上表演時更當眾錫錫,恩愛非常。而今晚崔嘉寶與吳岱融、鍾淑慧和王綺琴會到雲頂參與另一演出。

娛聞樂陪你走遍全球追星,即Like「娛果」FB 專頁!
BannerBanner