【有冇偉仔份?】《花樣年華》、《2046》第三部曲籌備中 王家衛指演員仍未落實

更新時間 (HKT): 2019.03.15 22:41
(攝影:林賓尼)

「香港電影編劇家協會2019年春茗」今晚於尖沙嘴舉行,其中王家衛獲頒發「榮譽大獎」,他在台上特別感謝多年來和他合作的編劇們:「多謝佢哋唔介意工時長隨傳隨到,24小時候命。」 又趁機為自己曾被指拍戲沒有劇本一事而平反,帶來親手撰寫的《重慶森林》電影劇本:「要多謝協會撐我,還我清白。講咗咁耐大家可能懷疑有冇劇本,所以我帶咗啲證據嚟,我真係有寫㗎!」

同時亦感謝家人,他說:「多謝太太同我個仔,成日得到我個身得唔到我個心,平時生日喜慶節日成日見我眼定定諗緊嘢,一副諗嘢樣。我平時寫劇本鍾意喺人多嘅地方,好似咖啡店、茶餐廳、酒吧,多謝咁多位老闆好錫我,成日醒我三文治凍檸茶。」

王導受訪時透露,正籌備新劇本《繁花》:「我拍過好多香港題材,惟獨未拍過老上海,呢套《繁花》係改編小說,係《花樣年華》、《2046》嘅第三部曲。」 他表示劇本正在創作中,希望今年或明年完成,更直言:「其實已經籌備咗好耐,起碼有四年。」至於演員方面,他表示仍未落實,但因故事所需故希望演員要講上海話。問到會否找梁朝偉演出?他表示:「冇所謂,如果偉仔識講上海話都可以。」