【傳年底結婚】英皇三姊妹齊雪卵 36歲阿Sa得富三代男友批准:佢OK

更新時間 (HKT): 2019.03.17 13:57

蔡卓妍(阿Sa)、周勵淇(Niki)、張智霖、呂良偉和王敏德今日在香港仔出席放水燈活動,各人在水燈寫上祝福。

阿Sa傳年底與男友石恆聰結婚,她否認:「冇咁嘅事,暫未有計劃,我唔急結婚,係其他人急,日日都催,真係吹漲。」有指阿Sa獲得電影女主角獎即嫁,她無奈說:「結婚同獎項唔係自己控制到,所以唔好諗,結婚唔係一件兒嬉事,好慎重,去到嗰個時刻就係。」她亦拒絕玩即興:「兩人相處要好充足,婚後係另一種生活。」

人妻Niki為好姊妹發聲:「佢好慘,成日俾人逼婚,阿Sa說:「佢結婚都係問我意見,我都有叫佢嫁,通常處理人哋問題可以好理智。」Niki分享婚後心態,她說:「冇乜特別,或者未有小朋友,好似拍拖感覺,佢開心就得啦,大個女仲叻過我。」對於生小朋友Niki會順其自然,但大呼:「好大壓力,個個都問我,一陣又話我着鬆身衫。」

36歲的阿Sa聞言稱未準備好生小朋友,對於兩位姊妹容祖兒和鍾欣潼都先後雪卵(相關新聞: https://bit.ly/2DXVDBf ),Sa自爆都會雪卵,她說:「已經食咗補給品幾個月,食完先可以做,之後要持續十日打荷爾蒙針,打完會肥,要肯定自己唔出嚟見人先得,要做大量運動,所以而家日日都做gym。」至於幾時可以實行,阿Sa說:「未有時間去做呢件事,真係要閉關,我係肥底,驚到時肥腫難分,大家應承我肥咗唔好話我肥,我有自知之明會減。」

此舉亦獲拍拖兩年的「富三代」男友石恆聰及家人同意,問過男友?Sa說:「佢OK。」屋企人?阿Sa說:「第一個係問媽咪,只要媽咪OK,任何人講乜我都會去做,因為我係來自我媽咪。但最擔心係要自己打針,自己打,嚇死人咩?所以要好得閒先得,到時會日日搵醫生打針。」阿Sa表示身邊好多朋友都有雪卵,並指:「好普遍,香港未結婚可以做,但生小朋友就一定要結婚先,咁樣件事好啲,對小朋友同家庭健全啲,但都因人而異。」

Niki現正以中藥調理身體,笑言可以考慮跟阿Sa一齊雪卵,笑說:「試咗自然方法先,有個人喺身邊唔好嘥。」家姐周汶錡和老公被拍到去龍母廟求生女,她已否認,但Niki大可效法,她說:「我都未去,家姐唔使去啦,試吓自然療法先,邊做邊試啦。」

張智霖最近和太太袁詠儀(靚靚)在大陸接拍真人騷,活動後又要趕往長沙繼續拍攝,早前靚靚在真人騷節目中,提及要自己去旅行即落淚,張智霖說:「佢都係一時感觸,其實佢唔太鍾意同我去旅行,佢覺得我比較hea,佛系旅行,佢好充實善用時間,大家有唔同意見,一家人去旅行好開心,阿仔就睇自己想點,我哋好民主。」

真人騷節目未來會否發放更多催淚彈?張智霖說:「未拍完都未知呀,我都以為好簡單只係去睇吓片,點知比想像中冇咁容易,要坐埋好多個鐘聚精會神睇旅行片段,都幾辛苦。」只睇片有龐大收入,取笑他好易賺,張智霖笑說:「我義務去咋,啲錢全部老婆袋晒咁滯,只係畀番車馬費我,一殼眼淚。」

娛聞樂陪你走遍全球追星,即Like「娛果」FB 專頁!
BannerBanner