【影視博覽】鄭伊健郭富城重返《風雲》? 古天樂預告有新角色加入

更新時間 (HKT): 2019.03.19 17:00

古天樂的電影公司天下一今日在影視博覽舉行記者會,提到今年將會有10幾部電影開拍及推出,重頭是CG科幻片《明日戰記》、電影版《尋秦記》及《風雲》,另外還有《犯罪現場》及由吳君如主演的《媽媽的神奇小子》等。

古仔被問到《風雲》的角色是否已定好?他說:「會有一啲新嘅角色加入。」至於會否再用《風雲:雄霸天下》的「聶風」鄭伊健及「步驚雲」郭富城?古仔表示:「一切都未定到,要等《風雲》個記者會開先可以公佈。」

而古仔今日在活動上與《尋秦記》的一眾演員宣萱、林峯、雪兒(Michelle Saram)、郭羨妮等分享感受,古仔今次很難得可以再與電視版原班人馬合作,他說:「回想套劇已經係2000年嘅事,10幾20年前,好多人都想我哋拍番電影版,最終都係覺得要用原班人馬先好睇。」宣萱指自己知道會開拍電影版,已經開心了幾年,更說:「終於等到呢一日,覺得好興奮,部電影不容有失。」郭羨妮就說:「其實《尋秦記》係自己第一部作品嚟嘅,能夠拍番電影版就覺得好興奮。」雪兒則指已經多年沒有與這班朋友見面,今次是個難得的機會,又可以敍舊。至於滕麗名則說:「因為阿古老闆同我講要打到七彩,所以希望佢畀多啲錢請多啲替身。」林峯亦指早已聽過古仔講這個劇本,每一次見到對方都說劇本有改動,感到很期待。

其後古仔與宣萱及林峯一起受訪,提到天下一今年開的戲比寰亞和英皇多,古仔說:「其實自己公司希望喺電影上有更多新嘅題材,同埋本土嘅題材,能夠有多啲創新創意。」問到今年電影上的投資會否好大?他說:「呢啲要問番電影公司,自己唔講呢啲。」而他就指《尋秦記》很快會開機。

另外,提到投資逾4億元的《明日戰記》,古仔在台上表示:「拍攝現場都幾震撼嘅,因為有啲基地同冧咗嘅大廈嘅實景,原來香港人都可以做到一啲咁大型嘅電影。」對於今次的投資金額,古仔笑言:「都好震撼!」合演的劉嘉玲及劉青雲異口同聲表示未拍過科幻片,所以心情興奮和期待。

而嘉玲及青雲受訪時,嘉玲提到:「拍呢部戲因為有好多生物上嘅名詞,同科技上嘅嘢要記,自己都記得幾辛苦幾頭痛,好彩有導演嘅提醒。」問他們是否打算憑此片幫古仔衝出亞洲?嘉玲笑言:「乜佢唔係已經衝出亞洲喇咩?」青雲則指:「第一次拍科幻電影,覺得題材好新鮮,拍嘅時候有好多冧樓嘅場景,有時都會係對於綠色布幕、對住啲空氣拍,佢話自己喺戲裏面做一個軍人。」問到有冇拍西片的感覺?他說:「未至於嘅,不過係一套幾得意同特別嘅電影,自己喺戲裏面着住一套30幾磅嘅盔甲拍攝,因為如果真係機械會好啲,但因為只係一套盔甲嘅衫,所以冇機械裝置,所以行呀跑呀做嗰啲動作出嚟嗰陣時都要吊威也嚟郁動,都非常之笨重咁啦,算係拍得幾辛苦。」

娛聞樂陪你走遍全球追星,即Like「娛果」FB 專頁!
BannerBanner