【關係猶如家人】Eddie Maher計劃復出拍新片 何慈茵:冇諗過佢咁快就離開

更新時間 (HKT): 2019.03.20 15:50

曾活躍於八、九十年代港產動作片的外籍男演員Eddie Maher(馬艾迪)昨日離世,與Eddie曾經合作無間、關係猶如家人的Mark Houghton(何麥)對於好友離世,感到悲痛。何麥的女兒何慈茵(Charlene Houghton)今日接受《蘋果》訪問,亦坦言為這位Uncle離世感可惜。

Charlene說:「真係好突然同可惜,Uncle Eddie同我爸爸係好朋友,我哋一直都有keep住聯絡,我喺噚日收到佢徒弟嘅通知,知道佢走咗。其實Uncle Eddie本身有心臟病,近年嘅身體都唔係太好,近呢3、4年成日出入醫院,但真係冇諗過佢咁快就離開。」她表示Uncle Eddie近年freelance教打拳,閒談間曾聽過他希望可以再拍電影:「我哋喺上個禮拜先傾過電話,因為我爸爸嚟緊會拍一套電影,本來有個角色係預咗佢會拍,佢都有問緊我啲資料,亦都有傾啲打拳嘅嘢。」

問到與這位Uncle的相處軼事,Charlene說:「有好多難忘事,我最記得以前細個嗰陣爸爸去咗拍電影,Uncle Eddie會陪住我,又或者揸車接我去探爸爸班,嗰陣佢係揸跑車,試過有一次我暈車浪,嘔到成架車都污糟晒,呢件事真係好深刻。」近年Charlene打比賽,找了Uncle Eddie做教練:「我第一次學kick boxing,就係佢教我,之後佢有幫我準備比賽嘅嘢,成日都有問吓我嘅近況,又或者教我點準備比賽,調整吓我嘅心理狀況,雖然而家佢離開咗,但係我都會keep住繼續,將佢教我嘅嘢好好發揮。」

至於後事的安排,Charlene說:「Uncle Eddie本身冇結婚,屋企人全部唔喺香港,不過有一個女朋友,佢後事由我爸爸、佢女友同徒弟一齊處理。」

娛聞樂陪你走遍全球追星,即Like「娛果」FB 專頁!
BannerBanner