【疑受細菌感染】左眼發炎不停眨眼 梁洛施後日做手術

更新時間 (HKT): 2019.03.20 20:14
(攝影:陳俊強)

林嘉欣、梁洛施(Isabella)、麥浚龍(Juno)等今晚在中環出席品牌活動,其中Isabella戴着太陽眼鏡現身,拍照時亦沒有除下,她解釋自己眼有不適:「左眼有啲發炎,星期五要做一個小手術,我都唔知醫生點搞,佢鍾意點搞就點搞,都唔知係眼瘡定係其他,不過做完都會休息幾日。」

問到兒子有沒有心痛她眼睛有事,Isabella說:「佢哋知㗎,不過好小事,醫生都話係小問題,10個人有8個人都有,都係細菌感染,我仲同醫生講自己有潔癖,但醫生就話唔關事,而家不停咁眨眼。」Isabella也指這次沒有影響工作,未來5月會到上海拍攝,香港的部份比較少。

至於林嘉欣被問到有沒有儲名牌袋及飾物給女兒,她說:「慶幸工作上都有啲品牌會送或借俾我哋,本身反而係自己造嘅多,斷斷續續都造咗幾年㗎喇,試過造啲皮手袋,好似車衫咁嘅啫,我會自己造嚟送畀朋友做生日禮物,由自己構思到點樣做,自己鎅嗰塊皮。都有造畀囡囡嘅,有啲手抽袋,有時加啲啪鈕落去,亦都有試過造啲鈕係整咗個啤啤熊樣喺上面嘅,老公都有收過嗰啲放八達通或鎖匙嗰啲小錢包,同埋屋企嘅相框都係自己整嘅,我覺得自己整的話會比較珍惜。」

至於會否一家人一齊做?林嘉欣說:「皮真係難啲,因為都需要力度,同鎅皮都有危險性,但係做出嚟嘅感覺同巿面上有得買嘅唔一樣。」提到其女兒造陶瓷,林嘉欣則造皮製品,問她會否一家人一齊出一個系列?林嘉欣說:「唔會喇,太花時間,同埋我哋都係見到屋企缺乏乜嘢就去造一個嚟用,都已經數唔到有幾多件,但係好似屋企門口咁,擺晒囡囡啲陶瓷,我覺得係一件幾好嘅事,因為買嘅容易,但由佢哋天馬行空去做,會珍惜啲。」

另外,同場的Juno前日度過35歲生日,他透露自己在工作中度過,忙於做電影《風林火山》的後期,問到他的生日願望?他說:「都冇乜生日願望,但有同女朋友慶祝,(女朋友親自下廚?)佢煮嘢食好好味嘅。」Juno又指預計《風林》在今年年尾或明年初上映,他指配樂都已經做了大半,另外今年會忙做謝安琪的演唱會,但詳情未可公佈。Juno更說:「自己仲有幾個劇本喺手,但會等完成晒《風林》嘅工作先開始。」問他剪片有否困難?他說:「都唔係好難,但初剪就7個鐘,同搵咗個剪接師係喺維也納居住,所以初期都要兩邊飛。」

裴斗娜今天穿一條短裙現身,她透過翻譯指今天在香港吃了點心,更想今晚四處參觀。問到想和那個香港演員合作,她說:「我很喜歡挑戰,自己很想拍,但沒有人邀請我,年輕時我也是看香港電影長大,包括有《英雄本色》、《天長地久》等等,我最欣賞的香港演員是梁朝偉。」裴斗娜又指拍攝網劇《Kingdom》時,因為遇上寒流,所以全劇組都會躲在同一個空間,因此和劇組很熟絡。

娛聞樂陪你走遍全球追星,即Like「娛果」FB 專頁!
BannerBanner