【嚴母育子】嫁老外仍堅持傳承中華傳統 蔡毅明必要兒子識中文

更新時間 (HKT): 2019.03.26 00:30

80後旗袍設計師蔡毅明(Grace)2年前與澳洲籍丈夫婚後誕下兒子Max,雖然嫁老外、生下混血兒子,但熱愛中國文化的Grace,堅持傳承中國傳統禮節思想,決要教導兒子謙卑有禮、孝順長輩跟尊師重道。日前Grace帶同一歲多的兒子Max接受訪問,首次帶兒子到playhouse玩樂,享受親子時光,原來自Max出世至今,Grace都只會與兒子以廣東話溝通,因她認為認識中文好重要:「揀學校我應該都係行國際學校,但一定程度嘅鞭策都需要,有一樣嘢我好緊張㗎,就係我要佢識中文,當然揀國際學校都要有中文、國語堂上,我同佢講廣東話,係想佢聽完識得講,而家小朋友基本上唔會唔識英文,我反而擔心佢越嚟越大會唔識中文。」Grace更會身教小朋友中國人基本的傳統禮節:「而家好多小朋友唔識得尊重、孝順呢方面,呢樣嘢好希望佢識,外國小朋友比較自由自在,可能未必識孝順尊重,尊師重道好緊要。Daddy識好多唔同知識可以教佢,中國傳統文化我會講解多啲。」

Grace生於一個管教嚴厲的家庭,現已為人母,為了孩子,Grace謂開始有壓力之餘,同時決定以一鬆一緊的方法教導,她亦樂意做嚴母一角,Grace表示:「我先生係澳洲人,係特別relax,所以好多嘢冇乜所謂、唔係好嚴,香港人特別緊張,可能一早就要幫小朋友搵學校、諗讀啲乜,先生比較relax,當然男人都唔係太理,得我去理,細細個要開始教佢,另一方面想佢開心去成長,rather than好似我哋以前讀書咁太大壓力。Daddy鬆,我再拉返番少少,比起我先生,我實係做醜嗰一面。」Grace又稱:「全部跟晒老公嗰套就乜都唔理,不過有時需要管制,我自己都係有個嚴父嘅家庭出生,對佢某程度上控制會係好事,不過就唔想好似以前咁大壓力,我覺得玩同有開心一面好緊要。」

跟好多家長一樣,Grace笑言自誕下Max後已經失去私人時間:「Max出世後好大改變,BB由出世到而家、甚至自己都好大改變,成個personal life都好唔同,以往想做乜都好彈性,而家基本上冇晒私人時間,唔係畀小朋友就係做嘢,忙完工作就好想返屋企陪BB,因為平時好少時間陪佢。」Grace兼顧生意及湊小朋友,兩樣均為她的最愛,Grace盡量希望取得平衡:「盡量都想兼顧到,Max係我至愛,做嘢都係我幾重要嘅部份,生意上彈性啲,又可以照顧好小朋友。以前工作壓力好大,令自己好辛苦好攰,但係而家一返到屋企望到Max,就算有幾煩嘅嘢,一見到佢就好開心,令到自己忘記一切。」而Grace亦感恩得到丈夫精神上支持,二人一同配合,盡力讓兒子有個開心愉快的童年。

修讀時裝設計的蔡毅明在上海出生,本身為模特兒,曾踏足國際時裝舞台,機緣巧合下開創自己的事業,於2010年創辦製作公司,同時發覺好多人對旗袍有需求,於是決心創立個人品牌Yi-ming,Grace說:「細個歷史好差,但係做咗時裝後,接觸中國文化多咗,每次去歐洲我都會帶定啲長衫出去,萬一有event要去,會覺得着上長衫係有代表性,最可惜係發覺大家覺得旗袍長衫係好老套,但係我就覺得如果後生一代着番嘅話,會將距離拉近番,如果唔係人哋會覺得好遠,唔一定大時大節先着,就算平時當便服都可以着得好靚。」經營品牌多年,Grace稱好開心長衫文化於近年受到重視,長衫設計師有增無減:「香港好多人支持旗袍文化,例如一啲旗袍教育、講座等喺學校推廣,而家越嚟越多人留意番,同一時間好多設計師會向呢一方面嘅專業去行。」

娛聞樂陪你走遍全球追星,即Like「娛果」FB 專頁!
BannerBanner