【第二屆最港電影大獎(10)】秋生出名要求高 阿澤讚小娟:拍得晒部戲已叻

更新時間 (HKT): 2019.04.01 06:00

由《蘋果動新聞》舉辦的「第二屆最港電影大獎」,第二階段的全民投票剛剛結束,亦意味着進入第三階段,即結合網民票數與專業評審票數得出賽果,前者比重佔40%,後者60%,最高分者奪獎,並於4月7日在第二屆最港電影大獎頒獎典禮公佈。今年經過一個多月的投票,總投票人數超過6000人,而專業評審分別由15人組成,包括杜汶澤、彭浩翔、郭子健、黃進、歐錦棠、潘源良、林子穎、崔允信、鄭政恆、沈旭暉,以及五名《蘋果動新聞》的「最港電影大獎」委員。

近年有很多關懷社會的電影出籠,令歐錦棠差點有偏見:「好老實,淨係聽《淪落人》個名係唔想入場,又sell悲情呀?但入場先再判斷。原來呢套係一套必睇嘅港片。」杜汶澤認為電影拍得好,不會是一個人的功勞,但一定歸功導演:「眾所周知黃秋生非常出名要求高,唔容易令到佢滿意。能夠拍得晒部戲,嗰個導演(陳小娟)已經好叻。」

黃進認為在陳詠燊執導的《逆流大叔》身上,找到久違港產小品的味道:「好似我哋以前好鍾意睇嗰啲《新紮師妹》呀,呢種情懷係對香港人係舒服嘅。」郭子健亦認同:「以最港電影嘅標準,《逆流大叔》係個個層面都牽涉到,好能令到大部份港人感同身受。」

另一齣令港人感受最深的,要數陳果的《三夫》,他以隱喻手法側寫香港的政治氣候,郭子健說:「佢嘅政治隱喻其實好唔隱喻,係明喻。但如果你用劇情片嘅方法嚟睇,我覺得好多觀眾會受唔住。」香港電影評論學會理事鄭政恆則說:「佢係好本土嘅電影,冇諗過拍畀大陸人睇,佢種拍法,誇張呀、黑色幽默,好保持到陳果嘅個人風格。」

不過,鄭政恆則比較欣賞莊文強的《無雙》:「《無雙》係一個幾好嘅示範,合拍片入面都好平衡番香港嘅元素。好明顯見到導演技法上稍高,經驗係稍豐富。」GLOs創辦人沈旭暉認為《無雙》是一齣散場後能令人思考的電影:「每一個人都有兩條線,真實係咁樣,幻想又係咁樣,到底邊樣先係真實呢?」

《地厚天高》導演林子穎則比較喜歡張經緯的《藍天白雲》,她說:「佢係近年港產片比較少見嘅風格。用一種比較抽離嘅方法去拍,構圖、顏色或者音樂都嘗試做一個陰暗嘅效果,我覺得呢個處理手法幾好。」

娛聞樂陪你走遍全球追星,即Like「娛果」FB 專頁!
BannerBanner