【結婚8年】安然度過7年之癢 莫文蔚:好sweet,仲好似拍拖咁

更新時間 (HKT): 2019.04.02 19:46
(攝影:沈健程)

莫文蔚(Karen)、林建岳女兒林恬兒(Emily)、呂志和孫女呂嘉瑩與朱熺暘(Rene)等,今天於銅鑼灣出席腕錶活動。Karen自小已有戴錶習慣,現時戴錶主要用來配襯衣服,她又爆曾買下一隻價值6位數字的手錶獎勵自己,問到她以前的男友會否送錶作禮物?她說:「反而係我送畀老公,佢唔捨得買嘢,之前見到隻錶好man,覺得好啱佢,佢都成日戴住。」

而她又謂老公自結婚後,自創了每年送戒指作禮物的習慣,Karen透露今年踏入二人結婚8周年,問她是否安然度過7年之癢?她笑說:「係呀,冇癢,好sweet,仲好似拍拖咁,因為成日走埠,小別勝新婚,出年還番一整年畀佢,我哋遠走高飛。」問她之後會否減產?Karen說:「唔會,我好多創作嘅嘢,會搞音樂劇、出碟,仲會同哥哥搞電影,都喺度密謀緊。」她還透露音樂劇會是全新創作,並鎖定找人氣歌手華晨宇演出一角,Karen說:「因為拍內地真人騷同華晨宇friend咗,好鍾意佢唱歌,好入戲,同佢講咗音樂劇預咗佢。」

Emily為此活動充當模特兒拍宣傳照,宣揚女企業家的獨當一面,她笑言自己不是專業模特兒,但為了下一代,她創辦投資公司並望回饋社會,Emily說:「我好鍾意呢個project,highlights女企業家,我開咗投資公司,想話畀人知我係認真做嘢嘅人,回饋社會,做一個企業家。」育有一對子女的Emily謂家庭永遠放首位,她說:「小朋友仲細,最緊要小朋友先,工作排第2,家庭永遠第1,而家做嘢都係為小朋友嘅未來。」Emily又指老公對她十分支持,她說:「佢係好成功嘅投資者,佢畀好多誠懇嘅意見我,而家train緊我,想我自己做到投資。」問她會考慮再生小朋友嗎?Emily笑說:「我好開心有一仔一女,唔排除生第3個,遲啲先,而家非常好,順其自然,plan唔嚟,自己都未ready,而家好開心。」

另外,眼鏡設計師Rene被問到前緋聞男友向佐求婚成功,Rene笑言會向太查問,她說:「梗係會恭喜佢,同佢咁耐朋友,祝佢幸福,生多啲。」

娛聞樂陪你走遍全球追星,即Like「娛果」FB 專頁!
BannerBanner