【金像獎導演篇】失業轉行未放棄追夢 真人版《逆流大叔》陳詠燊︰冇太太冇我

更新時間 (HKT): 2019.04.08 06:00

畢業於演藝學院主修編劇的陳詠燊(Sunny),初出茅廬時,便有幸跟導演馬偉豪(Joe Ma)的電影團隊工作,當年他負責編寫的劇本,包括賣座電影《新紮師妹》、《下一站…天后》等。涉足電影圈19年,直到去年才首次執導《逆流大叔》,電影叫好叫座,在今屆香港電影金像獎中,獲11項提名,包括最佳電影、男主角、男女配角等,Sunny個人則獲最佳導演、編劇及新晉導演提名,對此他坦言︰「係意料之外。」

現職演藝學院擔任編劇及創意發展講師的Sunny,提及當日與《樹大招風》的編劇龍文康聚會時,對方慫恿他開戲,Sunny說︰「我一路做編劇,佢叫我試下,我心目中嘅導演,係我service佢哋。我就搵番2004年寫咗個龍舟劇本,原本係畀我師父Joe Ma拍,當時開唔成,我就諗搵個平實啲故仔嚟拍。」

當導演對Sunny來說,看似遙遠但又好近。籌備初期,他獨自在影視博覽擺檔,推廣其劇本,籌集資金,能夠完成電影,他還要擔心票房,「開畫首日得20幾萬,我自己好驚,好彩後來得到大家支持,票房好似部戲咁逆流而上,自己部戲入圍最佳電影,個心離一離,好開心,真係好開心。」

入行初期,Sunny自言很幸運能在Joe Ma公司當月薪編劇,令同學羨慕。到2005、06年不少電影製作北上,在港開戲的數量大減,剛結婚的他卻面臨失業,「啱啱結婚就失業都幾難受,每日喺屋企煮飯等老婆放工,去搲嘢做都冇。」當時沒錢的他,閒時學師奶儲超市印花和積分,「後來有人搵我寫短劇,得幾千蚊我都做,之後我索性同老闆講,一氣過兩個月我幫你寫晒廿幾集,一次過畀嚿錢我。」就是這次令他重新燃起其信心。

經過低潮,Sunny數年前加入賽馬會當製作經理,「如果我繼續做落去,我應該係個中產人士,但呢個唔係我人生想做嘅事,我始終掛住電影。」之後他在學院教編劇,又當上專欄作家,同時他又去度劇本,半邊腳踏回電影圈,「教書係因為編劇唔能夠養家,教書幫到我好多,同學生傾故仔,從中令自己練番套功夫。」

談到作品略有成績,最想多謝誰?Sunny笑謂︰「我要多謝好多人,到時唔知有冇機會講,我而家講咗先啦!我要多謝師父Joe Ma,冇佢冇我,多謝古生(古天樂)、江玉儀、吳鎮宇,同埋我成隊crew等等,當然要多謝我太太同我個仔。」說到此,Sunny有點哽咽地續說:「太太嘅好,佢令我無後顧之憂向前衝,做我嘅後盾,管理好屋企。我哋讀書一齊咗25年,4分1世紀喇,當我失業發呆喺屋企,佢負責交租。佢對我講,我寫嘅書係最好睇,加油呀!如果冇佢撐住我,我諗我冧咗,冇佢冇我。」

娛聞樂陪你走遍全球追星,即Like「娛果」FB 專頁!
BannerBanner