【金像獎男主角篇】小師弟鬥4影帝 姜皓文︰覺得好神奇

更新時間 (HKT): 2019.04.11 06:00

姜皓文(黑仔)憑電影《翠絲》中的跨性別角色,首次獲提名香港電影金像獎最佳男主角,於今屆金像獎硬撼4位影帝級人馬周潤發、黃秋生、吳鎮宇及郭富城。知悉獲提名影帝當日,黑仔開心得翻觔斗,認為能與4位影帝一齊提名是神奇旅程,自認即使讓他半條街都是輸,若能奪獎更是電影界的新局面,有提名已是一個里程碑。

黑仔在《翠絲》中的角色,從小內心女性化,不知是對是錯,直至長大結婚生仔,被朋友喚醒內心的真我,決定做跨性別手術,與太太爆發衝突。黑仔指角色算是突破,他說:「對我來講演係有困難,係我演藝路上印記,值得紀念的一件事,但唔係代表作,代表作我仲等緊,今次係里程碑及印記。」

宣佈金像獎入圍當天,黑仔在內地拍戲,他說:「我心情十五十六,覺得入圍唔係咁易,當日諗住開工度過,唔使睇電話,點知導演話早收工,我咪焗住返酒店睇電話等公佈,自己唔想話畀太太聽,怕佢會失望,最後都忍唔住開咗電話睇,打埋電話畀老婆,同老婆講金像獎今日公佈,剛打開電話就聽到古天樂宣佈最佳男主角(候選名單),我仲放喺最尾添,好緊張,聽到後自己反應好混亂,我喺酒店張床打咗兩個觔斗,都幾開心,係一件不可思議、幾神奇嘅事。」

52歲黑仔不認為今次是遲來的提名,他說︰「唔會咁諗,我覺得仲喺度應該會有,只係欠咗啲嘢,開心同一班影帝級師兄一齊角逐,喺周潤發、吳震宇、黃秋生、郭富城中,加插姜皓文,覺得好神奇。」對於在今屆一眾強勁對手中提名是否好事,黑仔說:「兩睇,由始至終,我拍戲唔係為咗攞獎,我覺得成件事有型咗,可以躋身成班影帝中,我覺得唔係壞事。留畀鍾意睇我及電影嘅同業去揀,好多人睇戲有自己把尺,自己緊張唔嚟,唔會畀自己太大壓力。反之,我覺得係一個新開始,對上一次攞咗男配角後,大家對我認同,我再去努力,提名係畀我衝擊,係人哋畀我認同加油,呢個新開始,如果好彩畀我攞咗最佳男主角,我覺得係新嘅局面。」

周潤發、黃秋生、吳鎮宇及郭富城,黑仔指4位都鍾意,他們都冇得輸,黑仔說:「以一個小師弟來講係開心,今屆有一班最強對手,坊間講發哥係最勁,係王牌級提名。雖然對手強,但我覺得每一個演員有提名都要有信心,都想去攞獎,想同攞到係兩件事,唔係因為我想攞就攞到,要睇吓好唔好彩,睇吓評審鍾唔鍾意部戲,我係有100%信心。《翠絲》有9個提名我覺得係得來不易,9個提名都有機會去攞獎,就算攞唔到,都值得《翠絲》團隊驕傲。」黑仔指全部都是最大對手,他笑言:「全部讓我半條街都唔知得唔得,發哥喺度,畀着你夠唔夠膽去攞,會唔會手軟跌番落嚟。」

黑仔將今次提名金像獎確立為里程碑,他說:「將來希望自己謹慎啲,唔係因為金像獎而有變改,舊年發生過好多事,好多嘢值得我去調校、反省,今年會嘗試唱電影主題曲,有自己音樂會,有新元素電影,飾演戰地上嘅軍人,及正拍攝《拆彈專家2》。」

娛聞樂陪你走遍全球追星,即Like「娛果」FB 專頁!
BannerBanner