【嫻妃勁吸百萬fans】人數過2000萬派三點式福利? 佘詩曼:考慮吓

更新時間 (HKT): 2019.04.11 22:05

佘詩曼今晚在尖沙嘴出席一個網絡平台頒獎禮,阿佘獲頒年度實力演員,她表示因為《延禧攻略》嫻妃一角令她多在網上多了不少fans:「多咗成百萬,估唔到威力咁大,亦冇諗過呢套劇影響力咁大。」問到以後會否更活躍於網上平台,以及出post時會更小心,阿佘說:「不嬲都有諗清楚先post,始終有好多fans,希望對佢哋有好嘅影響。」

不過阿佘又指出post其實要看心情及時間:「如果有啲感受都會想同大家分享吓,之前都試過送相、小禮物派福利。」問她若fans人數衝到2千萬時,會不會像惠英紅一樣放三點式相派福利?阿佘就笑說:「諗吓啦,考慮吓啦,小紅姐身材梗係正啦!」

林峯將會回無綫拍《使徒行者3》,阿佘在《使徒》飾演釘姐而大獲好評,問到有否被邀回巢助陣?她表示:「有接洽過,不過檔期唔啱,要返內地拍劇,一早就應承咗,4月尾就會返去,預計有5個月喺內地開工,今次係古裝嚟,偏向遼代比較有蒙古feel,到時要去內蒙古同要騎馬,我都驚會整親條腰,上次已經試過整親。」提到之前劉德華也是因騎馬受傷,她說:「冇辦法,陰影一定有,但都冇辦法,雖然我知一定會有替身,但都想盡量自己做,因為騎馬係好玩嘅。」

對於大陸早前傳出限古令,阿佘就指自己亦曾聽聞,問她是否覺得自己彩,皆因限古令是在《延禧》播出後才傳出來,阿佘就說:「冇事就好啦!」

娛聞樂陪你走遍全球追星,即Like「娛果」FB 專頁!
BannerBanner