【金像獎女主角篇】同時獲三項提名 余香凝開心到匿埋嚎哭

更新時間 (HKT): 2019.04.12 06:00

現年25歲的余香凝(Jennifer),入行3年,於「第38屆香港電影金像獎」中,同時獲「最佳女主角」、「最佳女配角」及「最佳原創電影歌曲」提名,得知同時獲3項提名的一刻,她不是致電親友報喜,而是獨自跑到九龍公園自閉嚎哭一場,抒發內心的情緒,這份得來不易的感覺。Jennifer早前在銅鑼灣接受《蘋果》訪問時說:「相信之後都冇機會同一屆得到3項提名,今次已經好開心,25歲人生來說,係最型嘅一件事,贏獎我完全唔敢諗,對手太犀利。」

Jennifer憑電影《非同凡響》獲提名「最佳女主角」,而《逆流大叔》則獲提名「最佳女配角」,還有她主唱《非同凡響》主題曲《陽光普照》獲提名「最佳原創電影歌曲」。早前金像獎於文化中心公佈提名當天,Jennifer走到尖沙嘴買道具,她說:「嗰日我好緊張,完全唔敢睇直播同電話,因為翌日春茗要表演,走咗去尖沙嘴買道具,其實同文化中心好近,內心好矛盾,我知道2點鐘開始公佈,到2點20分都冇人打畀我,就同自己講冇㗎嘞,繼續買道具啦﹗隔咗一陣同事打畀我,叫我錄一段感想,話畀我聽中晒,我就喺條街道喊咗出嚟,但係條街好多人,我覺得自己好奇怪,最後選擇行入九龍公園入面坐低喊,調整番心情就打畀導演歐文傑同Sunny(陳詠燊),多謝佢哋兩位,隔咗好耐先回覆到我同事,當時情緒太複雜。」

最令她激動是《非同凡響》提名女主角,她說:「我知道入行3年要提名女配角好難,女主角更加難,同埋齣戲經歷得太多,上映一星期就俾人cut到剩番幾場,我哋一齊去謝票好似打仗咁,每一場都係打番嚟,到大家覺得口碑好,大家會叫我OK姐姐,到金像獎有一個提名,成件事好熱血。」

要飾演中學生是一項挑戰,Jennifer指人大了眼神會轉變,她說:「讀書時好多人以為我廿幾歲,但一望到我眼神就知我好細個,拍攝時當自己係個小朋友,專程返母校問可唔可以畀我返去讀幾日書,好感激母校畀我返去搗亂,無端端有舊生返去上堂,老師同學仔可能覺得被騷擾,但學校知呢部係慈善電影,好有意義,畀我打攪佢哋。當時我對DSE課程唔熟識,會買啲練習嚟做,跟學生嘅生活時間,放學返補習班,返到屋企打開書本,盡量投入。」

獲提名女主角的Jennifer表示,有看過其他對手的作品,她說:「好鍾意《三夫》曾美慧孜,全裸演出唔難,但要演到先難,全裸之後演繹得唔好,其實係嘥咗件事,而佢全裸、增肥,演輕度智障角色,有好多自己都搞唔清嘅慾望及情緒,佢真係所有嘢都做得好好,佢個角色係好攰,每場戲都好花氣力去演,我覺得佢好犀利係大熱,睇完極度讚嘆,佢係用生命嚟演戲。我好鍾意嘅阿Sa係繼《雛妓》之後另一突破,阿Sa喺我腦裏面永遠都好可愛跳脫( 俏皮 ),今次角色比較沉默寡言。」

對於競逐女配角會否機會較大呢?Jennifer說:「梗係唔會,紅姐無論做幾多次,都能發揮好有情緒嘅戲,好犀利。女配角紅姐係無敵,跟住就係周家怡,佢喺《無雙》入面好型,自己都入行幾年有提名已經好好。」Jennifer指自己在《逆流大叔》中,角色絕對有得發揮,她說:「在幾個大男人中,我可以掌控佢哋,我年齡最細卻最成熟,觀眾睇完以為我本人好似戲中教練咁惡,都幾得意。」

至於「最佳原創電影歌曲」獲提名,Jennifer指對其歌手身份而言,絕對是打了強心針的作用,Jennifer說:「我出歌其實係想表達自己想講嘅嘢,《陽光普照》唔係我作,係電影主題曲,但歌路同我類似,我嘅歌都係充滿正能量,當我有想法去表達時,都會出歌話畀大家聽。」Jennifer坦言,拍戲工作比音樂重要,她說:「如果人生冇戲演,對我來說是空白,我唔會有靈感、情感去作歌。」

Jennifer表示,會將其百分之99的事情告知媽咪,她說:「我獲提名媽咪特別開心,佢覺得由我決定做演員,經歷冇工作嘅日子,事業嘅高山低谷,見到個女被人肯定嘅一刻,佢好感動。我屋企同《非同凡響》嘅屋企好唔同,屋企自由度好大,我媽成日講,做任何事都屬於自己,做之前要諗清楚才做,我知道唔好令佢哋失望,細個好乖咁讀書,讀完書之後先去做自己想做嘅嘢。」

娛聞樂陪你走遍全球追星,即Like「娛果」FB 專頁!
BannerBanner