【唔准食雪糕】被古巨基踢爆怕老婆 張智霖:我由細聽你歌大

更新時間 (HKT): 2019.04.15 20:38

古巨基昨晚假紅館舉行尾場騷,吸引唐詩詠、蘇志威、向海嵐、傅明憲、姚瑩瑩等捧場,基仔請到張智霖(Chilam)做表演嘉賓,Chilam穿着大紅花碌碌西裝登場,基仔驚訝說:「嘩,你着到咁靚仔呀!」Chilam坦言一向都穿黑白灰,但為了襯基仔營造繽紛效果,故破例揀這件花碌碌衫。

47歲的Chilam比基仔大了1年,Chilam搞笑說:「我頭先聽你講嘢,我先知原來你係我前輩喎,你仲早我入行1年,我由細聽你歌大啦,前輩。」全場爆笑,跟着兩人合唱《現代愛情故事》,之後基仔指以前印象中,Chilam是一個24小時都靚仔的人,最近兩年因經常見面加深了解,發覺對方不但是一個靚仔,更是一個開心果:「Chilam係一個好錫老婆嘅人,我同佢有啲地方真係好似,記得有次Chilam嚟我屋企玩,我嘅工人姐姐攞雪糕出來,佢靜雞雞行去攞咗雪糕之後,就突然聽到阿靚(袁詠儀)好大聲、好惡咁大叫:『張智霖!你唔好食啦你!』」Chilam聞言笑說:「係呀,你咪同我一樣,古巨基其實都係一個飢民,都係成日冇嘢食㗎!」之後基仔去換衫,Chilam獨唱《歲月如歌》後跟觀眾拜拜。

去到尾聲時,基仔唱完最後一首歌,觀眾都不肯離場,不停大叫安歌,結果基仔再次上台清唱《苦浪漫》、《幸福方舟》,最後全場大合唱《情歌王》至12點才完騷,更因超時要被罰錢。

娛聞樂陪你走遍全球追星,即Like「娛果」FB 專頁!
BannerBanner