【為乜河蟹】北京國際電影節照上映 影帝黃秋生:愛奇藝係乜我都未知?

更新時間 (HKT): 2019.04.15 14:25

57歲的黃秋生昨晚憑電影《淪落人》捧走「第38屆香港電影金像獎頒獎」的「最佳男主角」獎座,實至名歸,今日更成各大娛樂版頭條新聞,昨晚內地傳媒《新浪電影》、《環球網》及《騰訊》亦有報道他封帝消息,得獎名單亦沒有遮了秋生的名字,但愛奇藝娛樂公佈的完整得獎名單時,「最佳男主角」獎項一欄卻被消失,大陸網民擔心秋生被「河蟹」終於出現了(新聞連結: https://bit.ly/2VJK3zz)。

秋生主演的《淪》片於北京正在舉行的「第九屆北京國際電影節」中,以視野環節有份上映三場,並將於本周五、六在北京的影院放映,由於反應熱烈,據了解三場門票已爆滿。秋生昨晚獲獎後,唯獨只有愛奇藝的報道「河蟹」秋生,但愛奇藝娛樂卻照播秋生獲男主角一刻的電視視頻。

對於愛奇藝「河蟹」秋生,他今日接受《蘋果》訪問時說:「或者佢睇到嗰度(指頒影帝時)瞓咗覺,我一啲都唔知,愛奇藝係乜我都未知?唔係電影公司咩?我唔知呀,冇咪冇囉,香港有啲(媒體)都冇我呀,有啲我講啲嘢又cut咗,有啲又寫錯,新聞嘅嘢,邊嬲得咁多,你要個個人都報我咩,咁咪好唔得閒。」

據知廣電局封殺名單根本沒有秋生,他說:「係囉,好多人都講。」可能有人驚青?秋生答:「呢啲就叫『白色恐怖』,每日唔知乜都驚,食嘢又驚,着衫又驚,由朝驚到晚,冇嘢嘅其實,我唔係話邊個造成,我形容呢種狀態,咁樣恐懼法就叫『白色恐怖』。」秋生再三強調不會理:「第一咁遠,第二我唔知人哋諗乜,邊理得咁多啫。」

娛聞樂陪你走遍全球追星,即Like「娛果」FB 專頁!
BannerBanner