【freestyle保青春】區瑞強分享「登六」旅程 翻舊賬為大台拍劇留皺紋

更新時間 (HKT): 2019.04.19 06:30

其實想知道區瑞強多少歲,真的不困難,只要上網一㩒,就彈出答案,他現年63歲,三年前已「登六」。

身形偏瘦的區瑞強,沒有中年發福,看起來特別「襟老」,他日前在尖沙嘴接受《蘋果》專訪分享了「不老之謎」,他說:「我讀書時,乜嘢運動都玩,打波、游水、划艇,乜都識,練到一身好本領。我以前讀寄宿學校,早午晚食飯都會飲豆奶,我諗係少年時個底打得好。」他續說:「我都冇乜養生之道,『登六』咗都未察覺要養生,不過早排咳咗好耐,我先留意吓飲食。我向來唔太食煎炸嘢,我覺得養生之道,係視乎每個人體質、成長環境同生活模式,啱我,未必啱你,專家同營養師講嘅亦唔可以照單全收。我自己就好鍾意食廣東菜,從來唔揀飲擇食,就算啲人話食『鹹魚』唔健康,又唔係餐餐食,只要自己身體機器run得暢順,我覺得食乜嘢都唔係大問題。」

區瑞強多年來都保持30吋腰圍,他自爆有不吃午餐習慣:「我運動量大,亦好大食,我平日會食少一餐晏,醫生話我新陳代謝快,所以食乜都燃燒晒。『登六』後燃燒冇咁快,所以食嘢要識得取平衡,我間中都食得好heavy,食吓啲惡毒嘢,比如牛雜,之後又食番啲涼瓜平衡番,好彩我鍾意食啲嘢原來都幾啱養生。」

區瑞強表示足夠睡眠也有助「凍齡」:「我晚晚起碼瞓8個鐘,我個名叫『區睡眠』呀,我明白都巿人係太忙冇得瞓,有啲人年紀大,只能瞓到5、6個鐘,瞓覺好重要,瞓得少會易老。我就瞓得食得,有時心情都影響睡眠質素,如果成日有嘢擔心咪瞓唔着。我每日時間表喺自己個腦,乜都自動調節,我係freestyle。」

保養都要由內到外,區瑞強自問都得天獨厚:「我臉形都幾baby face,令我望落去好後生,尤其我一笑起嚟。」區瑞強出道至今,他都貫徹喜歡戴帽:「以前做音樂主持,成日要吹頭,試過有次戴咗一頂牛仔帽,嗰日慳番唔使吹頭,發達喇,於是戴到而家,返唔到轉頭,我屋企有成間房係放帽,而家習慣咗戴帽keep young。」區瑞強還補充帽子下的秘密,他搞笑說:「我有頭髮㗎!」

區瑞強指了指臉上的幾條皺紋,他謂是82年為無綫拍攝青春偶像劇《愛情安歌》時留下的戰績,他說:「當年我一身兼幾職,歌、視同電台開咪,但無綫都話要度我拍劇,幾乎一日開足24小時,套劇又場場都有我份,忙到天昏地暗,我只係得坐車同化妝時瞓吓,就喺嗰時開完劇,從此臉上就多咗幾條皺紋同黑眼圈,同埋甩咗啲頭髮。TVB之後再叫我拍劇,我同佢哋講『你唔好呃我,我成世跟住幾條皺紋,講明你冇得畀我瞓,我唔拍,我唔係撈你呢啲』,我好彩底打得好,身體頂得住,同期鄭少秋個個冧晒廠。」

近日流行講「長命120歲」,63歲的區瑞強,直認心境開朗,經常保持在20歲,他說:「我個腦好活躍,從來只記得開心。我EQ好高,我乜都會let go,我唔高興都唔會即刻反枱,任何嘢我都唔會上心。我早幾年直情唔太記得自己幾多歲,有時要死60幾又得,50幾又得,人生長短唔重要,生命意義先緊要,圈中好多人浪費緊生命,佢哋有好多無謂應酬,同無謂爭拗。」

區瑞強享受人生,他熱愛演藝事業,最近密密開騷會知音,他於下月3到5日又在灣仔新伊館舉行《區瑞強名曲巨星真經典演唱會2019》,年年開騷是否很好賺?他笑言:「我哋民歌歌手唔係好賺,但如果唔賺,下次就冇得出第二張碟,而且今次做騷邀請咗好多嘉賓,唔通叫人帶錢嚟返工咩,一次半次冇所謂,但有酬勞,做起嚟投入感大啲。演唱會我一定自己搞番,我會睇實條數,我一定要賺錢。」

娛聞樂陪你走遍全球追星,即Like「娛果」FB 專頁!
BannerBanner