【下月約滿無綫】坐冷板凳半個月 李天翔稱冇後路都要走:靠自己出去搏

更新時間 (HKT): 2019.04.24 13:03

李天翔昨晚和吳堯堯(仙樂都)、布韋傑等藝人在上環參與李浩群的音樂會演出,獲一眾圈中好友甄志強、黃夏蕙、麥翠嫻等捧場。李天翔將於5月17日約滿無綫離巢,他直認近日在公司冇工作:「距離5月只有半個月都做唔到啲咩,唔會安排畀我啦!」

約滿後李天翔暫時會以自由身「搵食」,並決絕表示不會再簽約無綫,連部頭約亦沒有,李天翔說:「入行多年,早幾年已諗出去試吓,工作量都算多冇時間諗,到今年真正去諗,冇可能老人家先走嚟搏,雖然暫時未有後路,但會多唱歌登台或做其他工作,靠自己出去搏吓。」他又透露由於暫時在大台餘下合約並冇底薪,現時收入減少。

另外,仙樂都在演唱會唱歌,她說:「有時國內觀眾見到我好熱情,試過台下伸手到台上捉住我高踭鞋,搞到我卡住chok一chok郁唔到,要保安幫手先甩身,又試過大型的士高客人醉醉地會上台搶咪熊抱,想強吻你又未吻到,真係考你反應。」不過,她坦言近日受內地政策影響,登台活動減少,令收入相對下降,目前轉投賣小食做小生意幫補。同時,她表示泰籍母親患了腎病,下月仙樂都會返鄉探媽媽。

娛聞樂陪你走遍全球追星,即Like「娛果」FB 專頁!
BannerBanner