【良心僱主】司機灣仔繞道逆線行駛 吳啟明無意解僱司機

更新時間 (HKT): 2019.04.29 19:42

日前吳啟明的中港車牌坐駕因司機不熟路,誤闖中環灣仔繞道東行方向逆線行駛,險象環生,警方呼籲目擊者提供資料,後來獲悉涉事司機是吳啟明所聘用,事發時他正是後座乘客,誤闖逆線後雖然人車無損,但片段在網上瘋傳,而當晚吳啟明和司機並沒有任何行動,至翌日司機才到警署自首。

吳啟明今日傍晚如常到上環九如坊,他開設私房菜《慢煮兩餐》上班,並禮貌地接受傳媒訪問,見到事發當晚車輛停泊在舖頭門口,吳啟明拍照時笑稱:「呢架就係肇事車輛。」並多次驚嘆幸運冇人受傷及撞到其他車輛。

憶述當時情況,吳啟明說:「梗係好驚,咁樣衝過去,第二日收到朋友傳段片畀我,我即刻搵司機,搵到佢叫佢自首,因為睇到警方呼籲搵相關人士。」啟明透露65歲司機現時如常上班,絕對是良心僱主,他說:「本來咁驚險嘅事,作為老闆可能都會炒咗個司機,但我落唔到手,炒咗佢生計都成問題,又要面臨刑事檢控,又冇錢請律師,係一個好大傷害,佢暫時如常返工,直至到佢有咩問題,甚至停牌或者工作唔到先再算。」

而司機聘用短短兩個月就出事,要否陪同到警署協助調查?啟明說:「暫時未有受到警方邀請協助調查,要協助唔係我話去就去。」至於律師費用,啟明說:「已經請咗大律師,同我講未正式檢控,發咗一張擬控告通知書,可能係準備告,但咩罪我暫時未知道。」事件有冇影響他心情和舖頭生意?啟明說:「工作心情冇乜受影響,其實係唔小心不幸嘅事件,司機係一個好沉默嘅人,真係唔小心,佢有15分,揸車人士就會明白,證明佢冇cut過雙白線、衝紅燈嘅犯錯之類,平日好安全。」

事件發生後胞弟吳啟華好緊張,立刻慰問他,啟明說:「我咪話畀佢聽冇事囉,有驚無險!成件事首先冇撞車,冇撞毀物件,冇人受傷,有驚無險,真係好好彩。」至於司機面臨起訴心情如何,啟明說:「我唔知佢心情點,佢只係同我講咗句多謝我,佢係性格好沉默,大家冇乜就呢件事講嘢。」會否叮囑司機要加倍小心路面情況?啟明說:「唔通佢唔知咩,我再講驚畀咗好大壓力佢。」

啟明表示因為做廚又要應酬朋友,基本上每日在餐廳均會飲酒,為安全,一定要聘用司機,總結事件:「希望事件可以大事化小,佢真係轉錯一個彎,又係一條新路,唔係好熟,若轉入去一見車就會停,行咗一段先至見到有車。」

娛聞樂陪你走遍全球追星,即Like「娛果」FB 專頁!
BannerBanner