【永遠懷念】憶與梅艷芳最後個唱 倫永亮:係我最唔開心嘅一個

更新時間 (HKT): 2019.05.04 22:00
(資料圖片)

現年62歲的倫永亮,日前接受港台DJ車淑梅節目《舊日的足跡》訪問,節目上提到跟前輩白雪仙打牌趣事,及與好友梅艷芳合作感受。倫永亮指自從任姐(任劍輝)89年過身後,仙姐找他在粵語歌唱電影《李後主》加插配樂,因而開始跟仙姐熟絡起來。他說:「有次仙姐問我識唔識打牌,我衰多口話識,佢就約我逢星期四去打台灣牌。我其實唔多識,更加唔知佢咁認真,好嚴謹!我惟有抱住陪長輩的心情參與。仙姐係我非常敬重嘅藝術工作者,不過後來佢嫌我慢,踢咗我出局。仙姐牌品點?OK啦!哈哈哈!」

說到多年來依然單身,倫永亮表示跟阿梅有關。倫永亮指自己初戀是在美國夾band時,與樂隊的女歌手戀上,後來倫永亮回港發展,以事業為重,並與阿梅經常到外地登台,倫永亮說:「佢(阿梅)識好多佛學,講咗好多發人深省嘅佛偈,佢話一段感情或者工作,都會隨住時日改變,日常生活所有嘢都會改變,係無常嘅!佢成日叫我『放低』,如果嗰段感情唔啱自己就要放低,而家我睇好多佛書,發覺一個人一樣可以好開心。」

提起與阿梅合作她人生最後一個演唱會,倫永亮仍感心痛:「2003年,阿梅最後嘅演唱會,係我一世人做咁多演唱會最唔開心嘅一個,八場每一晚都唔開心,因為我喺下邊彈琴,我聽到台上嘅歌者係一個病人嘅聲音,有時沙啞,有時唔夠氣……」倫永亮表示最難忘每晚阿梅拖住長長的婚紗走上梯級,然後,那道門關上。他指那個出口正是紅館一個角落的入口,阿梅要走過很多樓梯才可返回後台,每一次倫永亮都會在樓梯下等阿梅,他說:「我好心痛,佢每一次都係冇晒氣,筋疲力盡,我同佢講要好好休息……」

倫永亮表示至今也不明白為何病重的阿梅還要堅持開show,他說:「可能係要留畀歌迷一份最深、最真摯嘅禮物!」他還表示阿梅那張演唱會DVD,自己只看了兩首歌,事隔16年,他還是不忍心再看下去。

娛聞樂陪你走遍全球追星,即Like「娛果」FB 專頁!
BannerBanner