【月初賺「8球」】自稱走穩守路線 黎耀祥或投資海外物業

更新時間 (HKT): 2019.05.13 17:11

黎耀祥、吳若希(Jinny)、孫慧雪、朱凱婷等今日在紅磡出席宣傳活動,分享親子及家庭溝通。有報道指祥仔於本月初沽出持有12年的碧堤半島物業,賬面獲利793萬元,有傳物業是他的風水屋,祥仔說:「冇乜所謂,見個巿好,自己覺得樓價都唔會特別升好多,不如套現先,樓市同大家脫離晒軌,都唔知點買樓,而且物業已經10幾年,係時候換吓,未來可能作其他投資組合,亦會留意有冇新盤合適。」

提到賺近「8球」,祥仔笑言:「10幾年先賺幾球,個個10幾年前買樓都賺啦。」他否認投資眼光獨到:「得1間,係叻就幾間啦!我哋穩守,有飯食有屋住就OK,樓價真係太高。」

沽出風水屋後,祥仔透露現時冇物業揸手,只租屋住,認為租抵過買,並說:「有朋友叫我投資海外物業,例如加拿大,政策穩定樓價冇咁癲。」兒子在美國留學,會否考慮在當地置業?祥仔笑說:「佢唔想喺嗰邊住,話要返嚟,我不知幾恨佢讀完書喺嗰邊工作入埋籍。」

另外,同樣已為人母的Jinny和孫慧雪均透露過了愉快的母親節,Jinny說:「現時BB仲細,爸爸想帶個女去畫一個心,但只可以畫到圓形,所以就錫咗啖送個吻畀我。噚日同媽咪、奶奶一齊慶祝,老人家見到小朋友份外開心,我媽咪比較少見阿女,個女最黐就係爸爸,噚日爸爸出門口即撒嬌,第1次畀個女喊住叫佢唔好出門口,佢不知幾開心,畀佢威1次。」而長輩亦沒有特別催再生B,Jinny說:「佢哋由得我哋啲後生,起碼過1、2年先啦,現時囡囡2歲處於最好玩嘅時候,好得意。」

孫慧雪囝囝現時21個月大,她說:「開始好多嘢講,講到完整句子,例如媽咪要返工,仲開始口花花,話鍾意女同學,真係人細鬼大。」昨日阿雪一連參加2個婚宴,囝囝從中送花給她做母親節禮物。

對於再追小朋友,她即耍手擰頭:「唔追住,佢太重,成日好似樹熊咁『撻』住我,而家成30磅,好多朋友都覺得佢似3、4歲,抱佢抱到手瓜粗壯咗。之前帶佢去日本旅行,日日要抱住佢唔肯落地,佢一瞓我先可以去行街,有咗BB之後冇咗自己生活,只係工作時候做番自己。」

娛聞樂陪你走遍全球追星,即Like「娛果」FB 專頁!
BannerBanner