【吐氣揚眉】憑《老人與狗》入圍台北電影節影帝 車保羅開心到瞓唔着

更新時間 (HKT): 2019.05.18 15:50

第21屆台北電影節昨日公佈入圍名單,現年59歲的綠葉車保羅憑香港短片《老人與狗》入圍最佳男主角,跟《老大人》的小戽斗、《寒單》的鄭人碩、《幸福城市》李鴻其和《蚵豐村》的喜翔4位台灣男演員拗手瓜,而車保羅也是今次唯一一名憑短片作品提名影帝的男演員。至於入圍最佳女主角者則有《人面魚:紅衣小女孩外傳》的徐若瑄和《傻傻愛你,傻傻愛我》的郭書瑤等等,而頒獎典禮則於7月13日於中山堂舉行。

車保羅入行38年,憑6呎3寸身高而受人注目,81年他加入麗的電視拍攝《IQ成熟時》、《對對糊》等電視劇,也曾拍過《審死官》等電影,今次車保羅首次提名影帝,絕對可喜可賀。

《蘋果》記者今日致電恭賀車保羅,他笑說:「提名啫,唔係真係贏咗。」是否人生第一次獲獎項提名?車保羅說:「未試過,第一次,所以瞓唔着,所以睇晒所有嘢,睇晒所有greeting。但今日情報又變咗啦,要訂機票過台灣行紅地毯。今日個導演同我講:『7月份你要畀期我,你去行紅地毯喎,我會同你準備晒所有嘢,酒店、飛機票各樣。』陪跑又好,點都好,都係一個event吖,why not?我台灣有好多兄弟姊妹喺度,順便又過去探親囉。」

車保羅表示短片是去年9月拍攝,前後拍攝了10日,他說:「嗰時係人嘅最低潮,啱啱離開博愛冇嘢做,而家我係元朗同益街市早更阿一,兩個世界嘅嘢嚟,做咗6個月啦,管理成個街市,大小二便一定要經我。」

問可覺得今次爭番啖氣、吐氣揚眉?他說:「對住當天講,阿媽,你個仔卒之得咗喇,就算攞唔攞到第一都唔緊要,起碼獲提名,撼低咁多部入圍,你都贏咗喇,就算唔得,有乜所謂吖,人生當中行過每一步路都係開心。同埋我哋幾十歲喇,爭乜鬼吖。有咪攞,冇咪算囉。」可有信心攞獎?「絕對有,因為我個樣喺戲入面太衰喇,我係一個潦倒嘅老人,個孫想養隻狗,就拖咗嚟畀我,我住公屋,我又有癌病,又失業,幾十樣嘢殺埋嚟,成部戲我係入戲㗎,未試過,同埋導演要求嘅嘢,我同佢好夾,所以出嚟係有火花喺度。」

車保羅指該片下月會在戲院上映3日,每日一場。《老人與狗》是第十三屆鮮浪潮國際短片節中本地競賽短片之一,由香港導演陳瀚恩執導,故事講述車保羅飾演獨居老人「老陳」,他得知自己患末期癌症而萬念俱灰,打算了結自己,豈料多年不見的外孫仔帶來一隻遭棄養的老狗給他飼養,兩個走到夕陽階段的生命相遇,互相帶來溫暖和慰藉。

事實上,車保羅人生亦充滿高低起伏,他曾經電視和電影工作不斷,直至03年被無綫炒魷而生活陷入困境,試過做保安及地盤雜工,更試過領取綜援過活,而同年1月,他5歲外孫女慘被車撞斃,車保羅17年接受《蘋果》專訪時,曾形容該段日子是他人生最黑暗、最潦倒日子,幸自己總算撐下來,而10多年前他開始在博愛醫院董事局做雜工,偶爾參與幕前演出,包括參與英國喜劇電影《特務戇J之救國大業》演出,及於17年參與ViuTV電視劇《詭探》演出。

娛聞樂陪你走遍全球追星,即Like「娛果」FB 專頁!
BannerBanner