【唔會簽公司】第4度上紅館歌迷反應熱烈 Mr.慶幸低潮遇到「叉燒飯」

更新時間 (HKT): 2019.05.19 10:58

樂隊Mr.昨晚順利完成第4個紅館騷《Everyone Concert 10演唱會》,主音布志綸太太及囝囝Adam、張繼聰與太太謝安琪及囝囝張瞻、劉美君、沈震軒與女性朋友、鄧月平、張耀揚、張紋嘉、許廷鏗及少爺占等到場支持。

夜晚8時35分開騷,甫開場,大銀幕顯示這10年間發生的事,當中包括雨傘運動、立法會宣誓風波等香港大事亦有提及。

唱到第二首歌《昨天》時,已全場站立,氣氛熱烈,Alan搞笑向場內保安表示:「我想同全晚嘅保安講,我哋個騷係畀佢哋企起身嘅,Mr.啲歌好安全,放佢哋一條生路啦。」說罷即全場起哄。

唱罷《細說.叫喊》,Mr.成員分享各自感受,布志綸笑謂:「多謝你哋同我哋一齊分享Mr.嘅經歷,好自私㗎呢個rundown,完全自high。呢10年Mr.做過好多演唱會,好想將我哋自己經歷放返喺演唱會度,所以好多高低起跌。」Ronny憶述11年前,Dash向他們表示有唱片公司想簽他們:「我當時就諗40歲嘅時候,想要一架跑車定一張樂隊嘅CD?我當然選擇了要一張樂隊嘅CD,今日我已經過咗30歲,我真係買唔起一架跑車,但係我擁有11張樂隊嘅CD。」而Dash坦言當了爸爸後,的確沒時間想樂隊的事,但回想令自己最開心的事就是與Mr.一起的時間:「無論我哋之間嘈過咩、經歷過咩,Mr.都係我嘅快樂泉源。」場面感動。

encore期間,鼓手Tom揚言不想後悔,要於台上與樂迷分享一個故事:「大家有冇睇過《食神》啊?大家知個主角叫史提芬周嗎?史提芬周最低潮、最唔開心嘅時候,有碗黯然銷魂飯。Mr.都有碗黯然銷魂飯,佢就係Jerald。每個人只要你經歷過高潮,而你又不幸經歷過低潮,我都希望你哋有自己嘅叉燒飯。」接着Mr.唱出《不屈》送給演唱會音樂總監Jerald,唱罷,Jerald與各成員擁抱。

致謝期間,Dash感觸地多謝好友張繼聰、謝安琪及陳偉霆一直支持。MJ認為Mr.讓他尋回自己:「如果畀1000次機會我,我都會繼續做多1000次,行多1000次呢條路,我相信佢哋4個都一樣。」最後唱出《尋找一千遍》。

原定已完騷,但由於歌迷不肯散去,Mr.再度出場encore,獻唱《森林》及《如果我是陳奕迅》,演唱會於晚上11時30分圓滿結束。

Mr.於慶功宴上笑指托歌迷鴻福,演唱會反應很熱烈,Dash說:「我哋之後應該會到內地巡演,不過詳情未知。」

鼓手Tom早前腰傷,他表示演出時不會感到痛楚,但今晚完騷後手及背都很痛:「我有個綽號叫唔留手,10年真係好難得,所以更加不能後悔,不能留手。」提到他感謝「黯然銷魂飯」Jerald,Tom自爆是沖涼時想起的,記者笑指他沖涼時想起Jerald,Tom即搞笑說:「見到Jerald,就諗起Jerald,哈。」

布志綸特別感謝校長譚詠麟及陳奕迅(Eason):「Eason秘密地嚟睇咗,畀咗好多意見我哋。最開心係離開咗舊公司,都有好多前輩愛錫我哋。」Dash透露綵排前,校長特別約他們食飯支持,Eason看演唱會亦看到眼濕濕。

至於他們會否再簽唱片公司,布志綸斬釘截鐵表示不會,MJ認為他們五子是否繼續夾band才是最重要,而且控制權亦在他們五子。

娛聞樂陪你走遍全球追星,即Like「娛果」FB 專頁!
BannerBanner