【婚紗相都未影】鍾舒祺10月結婚 鍾舒漫幫細妹做打雜

更新時間 (HKT): 2019.05.23 16:54
(攝影:曹家誠)

鍾舒漫(Sherman)、鍾舒祺(Sukie)今日到商台接受訪問,分享姊妹間平日相處之道,她們表示融洽相處在於每天講無聊事及互相嘲笑,Sherman表示:「呢樣先至係令我哋覺得最快樂,亦都係最珍貴嘅時刻。」 Sukie又舉例:「例如有時家姐喺facebook上寫咗一啲感性Status,大家都會留言叫佢加油,我就偏偏會講句『放棄啦』,即刻令成件事緩和晒開心番。」

而近來Sukie正忙於籌備十月舉行的婚禮,她說:「真係咩都唔識,始終係第一次結婚,好彩有Wedding Planner同家姐幫手,我連婚紗相都未影。」Sherman就表示自己屬於大打雜:「都係盡量幫佢,佢好多嘢唔識,仲問我結婚可唔可以著黑色婚紗?我話梗係唔得,始終老人家可能會唔鍾意,結婚唔係淨係兩個人嘅事。」

同樣到商台宣傳新歌《Only You》的戴祖儀,她稱歌曲主題是講述面對異地戀情的糾結和缺乏信心,自己亦試過:「我喺英國讀大學時畢業,但當時男友未(畢業),加埋大家性格不合,最後選擇咗分手。」

長大後的她又可接受異地戀?她說:「身邊嘅朋友異地戀好多有出軌問題,所以我冇信心,始終大家喺唔同地方。」談到戀愛史,她透露曾因跟一位男友不喜歡的男性朋友外出,當男友想看照片時,心虛的她竟一下子删除相簿內幾千張相片,她說:「我覺得好似隱瞞佢,事後我同男友講番,佢都好嬲因為冇晒啲相。」

娛聞樂陪你走遍全球追星,即Like「娛果」FB 專頁!
BannerBanner