【緋聞全部假】入行30年首個音樂會 漢洋自爆已婚有一子一女

更新時間 (HKT): 2019.06.01 11:43

漢洋入行30年首個個人音樂會昨晚在旺角舉行,黎瑞恩、陸詩韻等人撐場,其餘好友張衞健、梁漢文、佘詩曼和姜皓文等拍片支持。雖然全晚入座率僅約7成,但漢洋仍賣力演出,唱了多位歌手如張學友、太極、周杰倫、張國榮和梅艷芳的歌。

甫開場漢洋唱了多首80年代歌曲後,他向現場觀眾打招呼,感謝觀眾看一個堅持夢想30年的人演出。漢洋表示89年參加新秀得亞軍,隨後得羅文賞識收為徒弟,即場他唱了多首師父歌曲作出致敬,更自爆當時以為自己「紅」了:「我覺得好威好巴閉,但因為唔同原因入咗雪櫃,之後做過好多份工好辛苦又唔開心。覺得學友都唔係唱得好好,我後生過佢、靚仔過佢、身型好過佢,佢有嘅我都有,佢冇嘅我有。」隨後更列出10首「眼紅歌曲」,包括四大天王、羅文和李克勤等人的歌名,剖白年少輕狂的日子:「我覺得唔會唱得差過佢哋。」其後他曾轉戰台灣,但好友張衞健卻勸他回港做幕後。

入行以來遇過低潮,但獲得很多友誼,昨晚黎瑞恩、新聞之花陳嘉倩、小雪、張崇德、張崇德和譚嘉荃分別上台與他合唱,黎瑞恩上台搞氣氛說:「我覺得個場少人,冇乜掌聲。點解你頭先跳舞好似跳甩手操?個樣好尷尬。」

曾經跟多位女星傳緋聞,漢洋突然由觀眾席帶位小男孩上台,自爆是自己兒子Hin Hin(10歲),父子合唱《you raise me up》,二人對話更搞笑,阿仔自言剛瞓醒,漢洋驚訝:「你瞓咗咁耐?唔係等今日先嚟瞓?老竇開騷你都瞓?」之後他再自爆:「我仲有一個(15歲女兒),好惡唔掂得,一掂佢就摑我。啲人話我同邊個拍拖,其實拍拖嗰位係19歲到宜家,係我第1位女友。」

完騷訪問時漢洋指太太不願公開身份所以沒到場,也不肯透露何時已結婚:「好複雜,好多私人問題所以冇講,自己又唔係Famous歌手,無端端唔知點講出來。宜家30年又整個音樂會,唔講等幾時。」雖然屢次跟其他女歌手傳緋聞,但太太明白,他指只有小雪和譚嘉荃知道他的事,但連小雪都未見過對方太太:「我哋都係同樣有兩個細路,都係差不多年紀。」而小雪今次回港逗留2星期左右,會出席節目外,更會傾工作,有意再唱歌。

娛聞樂陪你走遍全球追星,即Like「娛果」FB 專頁!
BannerBanner