【由汽油彈到反修例遊行】不滿達臨界點? 黃秋生:上街訴求係啱嘅

更新時間 (HKT): 2019.06.07 18:00

本周日即6月9號是民陣發起的反《逃犯條例》遊行,預計參與人數有機會超過當年「反廿三條」的50萬人。正當各方面都嚴陣以待之際,今日凌晨警方衝鋒車遭狂徒掟汽油彈襲擊( https://bit.ly/2WtyiBJ),事後警方表示譴責。事有湊巧,早前有網絡傳聞指,有外國勢力動用數億,意圖在大遊行發動暴亂,更會出動大量鐵枝、木棍,更提到有汽油彈,難免令人將兩件事混為一談。

影帝黃秋生今日在facebook,以推理方式拆解事件,他表示:「做乜唔係嚴查係譴責?咁大鑊都係譴責咋?咁啲警察以後着定防火衣得嘞。莫洛托夫鷄尾酒(汽油彈)唔係一般人識整。手法同速度都好專業。我哋拍戲經常做呢啲危險嘢,要有呢種準確及速度,要好有經驗先得。疑點一。警車未到前,嗰條友已經着咗支嘢過馬路,去邊?行到一半見到有警車走翻轉頭,抑或本來唔係要掟警車?因為呢種鷄尾酒,點着就要掟,條友仲够膽攞住過馬路。當係攞住蠟燭咁。好淡定。目標極可能係馬路對面嘅嘢。」

秋生事後接受《蘋果》電話訪問,問到有否聽過上述的網絡傳聞,他說:「冇聽過,我估(反修例遊行)都好容易有衝突,已經唔係一部份人嘅反應,已經係整個社會,包括律師、醫療界同學界,感覺好大件事。人多就梗係有唔同諗法同方法,感覺上好容易有衝突。」秋生話「送中」條例,令到整個社會都反對,已經不可以說成只是一小撮人,他覺得從掟汽油彈連結到市民的不滿:「可能係某啲人嘅反應、處理方法表示不滿啦。毓民好耐之前已經講咗『唔通真係要逼到掟汽油彈咩』,真係會有,你咁樣,真係會有啲人咁樣做,可能真係到咗掟汽油彈嘅臨界點,唔係唯勢壓迫,可以舒緩不滿嘅......陰謀論又係另一樣嘢啦!」

講到星期日遊行,秋生自言一向不會出席類似活動,但就呼籲上街民眾要小心:「6月9號上街好熱呀,帶定樽水、工業頭盔、毛巾有乜嘢事濕啲水遮住個鼻快啲走。着定啲硬啲嘅鞋,如果係我就行側邊,盡量互相幫助,希望冇事。表示訴求係啱嘅。」

娛聞樂陪你走遍全球追星,即Like「娛果」FB 專頁!
BannerBanner