【靚抽反惡法】做你覺得啱同好嘅事 黃偉文開箱射暗箭:千祈唔使心虛

更新時間 (HKT): 2019.06.12 14:54
網上截圖

逃犯條例殺到埋身,除了黃耀明、何韻詩、王宗堯等站上前線力抗惡法外,有藝人選擇睇你唔到,當冇事發生;有藝人就用各自的方式低調表態,向惡法說不,如填詞人黃偉文(Wyman)就拍片貼IG,藉拆禮物在網上發聲:「千祈唔好畀人嚇親,做你覺得啱同好嘅事,千祈唔使心虛。」

昨晚Wyman在網上記錄「每日都買一樣嘢」,日期回帶到2019-6-9,即103萬人上街反惡法的大日子,並備註「平生不作虧心事 夜半unbox也不驚」,Wyman在短片中為一份禮物開箱,邊拆邊說:「拆呢份禮物時,同大家講個有關心虛嘅故仔,話說屋企人上個禮拜行Chanel,行行吓突然見到一個熟悉嘅背影畀緊錢,懷疑就係畀緊呢份禮物嘅錢,當屋企人嗌呢位送禮者時,佢突然回頭露出一個,佢人生中心虛嘅新高峯,呢份禮物係Chanel籃球,我一定諗到方法善用呢個鏈袋。」

最後,Wyman意有所指說:「我今日想講,好多時你以為做壞事先會心虛,其實做好事都會心虛,不過,千祈唔好畀人嚇親,做你覺得啱同好嘅事,千祈唔使心虛。」

Wyman一招靚抽曲線反惡法,網民留言:「unbox都射到箭出嚟!好嘢!做覺得啱嘅事,係唔使心虛!」、「體諒你唔能夠明言,都多謝你」、「感動加油hk」。

娛聞樂陪你走遍全球追星,即Like「娛果」FB 專頁!
BannerBanner