【引渡惡法】袁彌明與爸爸兩代遊行 直斥林鄭冇悔意:靠攏咗共產黨變咗狗官!

更新時間 (HKT): 2019.06.16 16:16

特首林鄭月娥無視103萬香港人反對,強推《逃犯條例》修訂,6月9日遊行更發生警方用武力鎮壓示威者,爆發流血衝突,至少72名示威者受傷,雖然昨日林鄭宣佈暫緩修訂條例,並未有撤回修訂,依然定性6.9衝突為暴動,市民都不收貨,今日再舉行6.16反惡法遊行表態。

人民力量前主席袁彌明與商台DJ細蘇分別在銅鑼灣加入遊行,袁彌明與爸爸一齊參加遊行,她表示:「今日我哋全家一齊出嚟慶祝父親節,雖然冇嘢可以慶祝,同埋今日最緊要出嚟係要求林鄭下台,唔可以定性星期三係暴動,用呢樣嘢去告我哋香港學生,令到學生坐監。」問到有否留意昨晚一名反對修例的男子在金鐘墮樓身亡事件,袁爸爸表示:「悲劇,係悲劇,所以我哋應該制裁破壞一國兩制嗰啲人,唔畀佢哋去旅遊,要封鎖佢哋財產,連啲仔女讀書都冇得傾。」

袁彌明表示事件後,她已在網上簽了好多聯署,包括歐盟、英美,甚至乎日本,認為應該要制裁林鄭全家,袁爸爸說:「既然佢剝削我哋嘅人權,我哋剝削佢嘅人權。」對於今日上街遊行市民人數眾多,袁彌明覺得好鼓舞:「上個禮拜係我哋一個表態,今次更加要譴責警方暴力,林鄭一點都冇悔意、冇道歉,冇人下台,冇人負責,今日行出嚟係我哋對政府表態,一定要有人負責同下台。」

談到林鄭昨日在記者會的表現,袁爸爸說:「佢完全冇悔意,唔知佢喺邊度讀書。」袁彌明在旁補充:「佢一靠攏咗共產黨就變咗狗官,已經唔存在嗰啲精英制度。」對於林鄭自稱令香港相對平靜,她表示:「你睇吓一百萬以上嘅人出嚟,點係平靜,原來佢仲衰過梁振英。」最後,對於今次演藝界多了人關注發聲,她表示:「好開心,好鼓舞,同埋而家都唔使靠大陸條水,而家劇同電影乜都唔拍得,希望演藝界同其他界別都好,有影響力嘅人更加多出嚟發聲。」

娛聞樂陪你走遍全球追星,即Like「娛果」FB 專頁!
BannerBanner