【安心過後】Sammi怕引起混亂冇嚟睇騷 「過來人」蘇永康:件事會慢慢淡

更新時間 (HKT): 2019.06.23 10:54

蘇永康兩場紅館演唱會《All that Jazz(&pop)》昨晚圓滿結束,獲好友張衞健、謝霆鋒、蘇志威、郭偉亮(Eric Kwok)及太太葉佩雯、關之琳、薛凱琪及汪詩詩等到場支持。

完場後,康仔受訪時被問到今年是推出唱片的第三十個年頭,會否再舉辦演唱會?他說:「其實公司每年都有問我入唔入紙(紅館),我自己同中樂團合作過,覺得好好玩,但係如果要巡迴就有啲困難,因為佢哋好忙。」他表示台北和新加坡亦有中樂團,但要考慮歌曲是否適合:「我哋有晒啲樂譜喺手,嗰啲係最值錢嘅,但係如果去唔同地方,可能唔係首首歌都啱,因為每份譜要成兩萬蚊,如果寫過會好貴,今次嘅製作成本唔會平過平時,好多謝公司都畀我搞。」

提到兩歲兒子蘇展弘(Jazz)亦有到場,蘇永康笑指兒子看了三場:「因為rehersal嗰日,佢都有嚟,所以佢睇咗三場。今日下午,我仲帶咗佢上台感受下,原本想幫佢影張單人相,但係佢好驚,攬住老婆隻腳。」他表示完騷後不會放假去旅行:「淨係抖一日,之後就返去《娛樂大家》,去咩旅行吖,湊仔返學仲好。」

至於Big Four四個好兄弟中,獨欠許志安未有現身?蘇永康說:「其實我同老Sam(Sammi鄭秀文)同安仔成日通電話,Sammi都想嚟,但係佢好細心,諗到如果嚟會引起某啲混亂,但係佢呢兩、三晚都有message鼓勵我。」

日前《愛.回家》於節目中抽水,蘇永康反問記者甚麼事,得知是安心事件後,他說:「我真係唔知,雖然佢收視好高,不過我好少睇。」記者指節目中詳細提及事件細節,連網民回應亦跟到足,問他會否覺得事隔兩個月再抽水不合適?蘇永康認為假如編劇創作亦要「勒住」,便會失去創作自由:「我相信呢件事會慢慢淡,安仔同Sammi絕對會勇敢面對,就好似我自己件事(台灣涉毒)咁,我唔怕大家提,因為唔可以逃避同埋驚,反而要去面對。至於(抽水)啱唔啱,冇乜嘢啱唔啱,要數嘅話,網上咪仲離譜。」

娛聞樂陪你走遍全球追星,即Like「娛果」FB 專頁!
BannerBanner